ఆరోగ్య బీమా

ఈ రోజుల్లో అనేక ప్రాణాంతక వ్యాధులు వస్తున్నాయి. దోమకుడితే చాలు ప్రాణాలు గాల్లో కలిసిపోతున్నాయి. అనేక వైరల్ జ్వరాలు, వైరల్ ఇన్ఫెక్షన్లు వస్తున్నాయి. నీరు కలుషితం కావడం ద్వారాను వ్యాధులు వస్తున్నాయి. వీటికారణంగా హాస్పిటల్లో చేరితే బిల్లు మోత మోగిపోతుంది. అందుకే ఆరోగ్య బీమా తీసుకుని ఉంటే ఆస్పత్రిలో చేరినప్పుడు అయ్యే ఖర్చుల గురించి బాధ పడాల్సిన అవసరం ఉండదు. ఈ రోజుల్లో కనీసం రూ. 5 లక్షల బీమా కవరేజీ తప్పనిసరిగా మారింది. మంచి బీమా కంపనీని ఎంచుకొని ఇంట్లోని సభ్యులందరికీ ఆరోగ్య బీమాను తీసుకుంటే ధీమాగా ఉండవచ్చు. 35 సంవత్సరాల లోపు వయసు ఉంది ఇద్దరు పిల్లలు ఉంటే రూ. 15 వేల లోపు ప్రీమియంతో రూ. 5 లక్షల కవరేజికి బీమాను తీసుకునే అవకాశాలున్నాయి. ప్రస్తుత పరిస్థితుల్లో కార్పొరేట్ హాస్పిటల్లో చేరితే ఎంత ఖర్చు అవుతుందో ఊహించలేదు. కాబట్టి కాస్త ఆర్థికంగా భారమైనా ఆరోగ్య బీమాను తీసుకోవడం మంచిది.

వాహన బీమా

ఈ రోజుల్లో వాహనాలకు థర్డ్ పార్టీ బీమా తప్పనిసరి. దీనికి బీమా ప్రీమియం తక్కువగా ఉంటుంది. బీమా ప్రయోజనం కూడా తక్కువే ఉంటుంది మరి. అందుకే సమగ్ర బీమాను తీసుకోవడం వల్ల వాహనానికి ఏదైనా ప్రమాదం జరిగినప్పుడు తగిన పరిహారాన్ని పొందడానికి అవకాశం ఉంటుంది. వర్షాకాలంలో వాహనాల్లోనికి నీళ్లు చేరే అవకాశం ఉంటుంది. అప్పుడు వాహనమే కాకుండా ఇంజన్ కూడా పాడవడానికి అవకాశం ఉండవచ్చు. వరదల వల్ల వాహనాలు కొట్టుకుపోవచ్చు. లేదా వాటికి నష్టం వాటిల్ల వచ్చు. కాబట్టి వాహనం బీమా తీసుకోవడం వల్ల వర్షాకాలంలో తగిన రక్షణను పొందవచ్చు.

గృహ బీమా

ఇంటికి బీమా తీసుకోవడంలో చాలా మంది నిర్లక్ష్యం వహిస్తుంటారు. తమ ఇంటికి ఏమీ కాదన్న భరోసానే ఇందుకు కారణం. కానీ దురదృష్టవశాత్తు ఏమైనా, ఎప్పుడైనా జరగవచ్చు. ఇళ్లకు అగ్ని ప్రమాదాలు జరిగిన సందర్భాలు ఉన్నాయి. వర్షాలవల్ల వచ్చిన వరదలతో ఇల్లు కొట్టుకు పోవడం లేదా కూలిపోవడం జరిగిన ఉదంతాలు ఉన్నాయి. పిడుగు పాటుకు కూడా గృహాలకు నష్టం జరిగిన సందర్భాలు ఉన్నాయి. కాబట్టి ముందు జాగ్రత్తగా గృహ బీమాను తీసుకోవడం మంచిది.

వ్యక్తిగత ప్రమాద బీమా

ప్రమాదాలు ఎప్పుడు జరుగుతాయో ఊహించలేము. రహదారిపై మనం సక్రమంగానే వెళుతున్న ఎదుటివారు అంతే సక్రమంగా, బాధ్యతగా రావాలన్న దేమీలేదు. అలాంటప్పుడు మీకు ప్రమాదం జరిగి నష్టం కలిగే అవకాశం ఉండవచ్చు. వర్షాకాలంలో వాహనంపై వెళుతున్నప్పుడు రోడ్డుపై ఎక్కడ గుంతలు ఉన్నాయో తెలుసుకోవడం కష్టం. వాటిలో పడిపోయి ప్రమాదానికి గురైనప్పుడు మీరు నష్టం జరిగే అవకాశం ఉంటుంది. కాబట్టి వ్యక్తిగత ప్రమాద బీమా తీసుకుని ఉంటే మీకు బీమా రక్షణ లభిస్తుంది. ప్రమాదం వల్ల శాశ్వత అంగవైకల్యం సంభవించవచ్చు. లేదా తాత్కాలిక అంగవైకల్యం రావచ్చు. మరణం కూడా సంభవించ వచ్చు. ఇలాంటి సమయంలో మీకు లేదా మీ కుటుంబానికి బీమా రక్షణ పొందడానికి అవకాశం ఉంటుంది.