వాషింగ్టన్: చైనా మొబైల్ దిగ్గజం హువావేపై అమెరికా కఠిన ఆంక్షలు విధించిన విషయం తెలిసిందే. డొనాల్డ్ ట్రంప్ హెచ్చరికల నేపథ్యంలో గూగుల్, ఫేస్‌బుక్ వంటి సంస్థలు హువావేను దూరం పెడతామని ప్రకటించాయి. ఈ నేపథ్యంలో హువావే కీలక నిర్ణయాన్ని ప్రకటించింది. తమ సొంత ఆపరేటింగ్ సిస్టంను త్వరలో లాంచ్ చేయనున్నట్లు తెలిపింది. తమను తక్కువగా అంచనా వేయవద్దని, ఆండ్రాయిడ్‌కు ప్రత్యామ్నాయంగా హాంగ్‌మెంగ్ పేరుతో కొత్త ఓఎస్‌ను లాంచ్ చేయనున్నట్లు తెలిపింది.

హువావే హాంగ్‌మెంగ్ ఓఎస్ పరీక్షలు ఇప్పటికే పూర్తయ్యాయని, త్వరలో తమ ఫోన్లలో ఆండ్రాయిడ్ స్థానంలో గ్లోబల్‌గా దీనిని అందుబాటులోకి తీసుకు వస్తామని తెలిపింది. హాంగ్‌మెంగ్ ఆపరేటింగ్ సిస్టంను ఇప్పటికే చైనాలో మిలియన్‌కు పైగ స్మార్ట్‌ఫోన్లలో వినియోగిస్తున్నారని, త్వరలో ట్రేడ్ మార్క్ సాధిస్తామని హువావే టెక్నాలజీస్ కో లిమిటెడ్ పబ్లిక్ అఫైర్స్ అండ్ కమ్యూనికేషన్ వైస్ ప్రెసిడెంట్ ఆండ్రూ విలియమ్స్ తెలిపారు.

ప్రస్తుతం హువావే ఫోన్లు గూగుల్ ఆండ్రాయిడ్ మొబైల్ ఆపరేటింగ్ సిస్టం వర్షన్‌తో రన్ అవుతున్నాయి. తమ ఫోన్లకు ఆండ్రాయిడ్ సేవలు పూర్తిగా నిలిపివేస్తే ఆలోచిస్తామని, అప్పటి వరకు హాంగ్‌మెంగ్ లాంచ్ విషయం చెప్పలేమని హువావే అంతకుముందు తెలిపింది. ఇప్పుడు కొత్త తమ ఆపరేటింగ్ సిస్టంను లాంచ్ చేసేందుకు సిద్ధమైందని తెలుస్తోంది.

ప్రస్తుతం అమెరికా కంపెనీలైన గూగుల్, యాపిల్‌కు చెందిన ఆండ్రాయిడ్, ఐవోఎస్ ఆపరేటింగ్ సిస్టమ్స్ మార్కెట్‌ను ఏలుతున్నాయి. హువావే 2012 నుంచి సొంత ఆపరేటింగ్ సిస్టం పైన పని చేస్తోందని పలు నివేదికలు వెల్లడించాయి. తాజా ప్రకటనతో అమెరికా ప్రభుత్వంతో గూగుల్, యాపిల్ కంపెనీలకు షాక్ అని చెప్పవచ్చు.