ట్రంప్ ఎఫెక్ట్, హువావేకు ఫేస్‌బుక్ షాక్: ఫేస్‌బుక్, వాట్సాప్ లేకుండానే..

చైనా మొబైల్ దిగ్గజం హువావేకు వరుసగా షాక్‌లు తగులుతున్నాయి. ట్రంప్ నేతృత్వంలోని అమెరికా ఆంక్షల నేపథ్యంలో హువావేను టెక్ సంస్థలు దూరం పెడుతున్నాయి. ఇప్పటికే గూగుల్ సహా పలు కంపెనీలు హువావేకు తమ సేవలు ఉండవని చెప్పాయి. గూగుల్ తీసుకున్న నిర్ణయం ప్రకారం 90 రోజుల తర్వాత హువావే కొత్త ఫోన్లకు గూగుల్ సేవలు ఉండవు. ఇప్పుడు సోషల్ మీడియా దిగ్గజాలు ఫేస్‌బుక్, వాట్సాప్, ఇన్‌స్టాగ్రాంలు కూడా అదే బాట పట్టాయి.

ఫేస్‌బుక్ తాజాగా కీలక నిర్ణయం తీసుకుంది. హువావే కొత్త ఫోన్లలో ఫేస్‌బుక్, వాట్సాప్ ప్రీ ఇన్‌స్టాల్ యాప్‌లు ఇక ఉండవు. అవి కావాలంటే డౌన్‌లోడ్ చేసుకోవాలి. ఇప్పటికే హువావే ఫోన్లు వినియోగిస్తున్న వారికి మాత్రం ఇబ్బంది ఉండదు. ఫేస్‌బుక్, వాట్సాప్‌లకు సంబంధించిన అన్ని అప్ డేట్స్ పాతవారికి లభిస్తాయి.

ఫేస్‌బుక్, ట్విట్టర్, ఇన్‌స్టాగ్రాం వంటి సోషల్ మీడియా యాప్స్ తమ కొత్త మొబైల్స్‌లో ప్రీ-ఇన్‌స్టాల్ యాప్స్ కోసం ముందే ఒప్పందం కుదుర్చుకుంటాయి. ఇది ఇద్దరికీ ప్రయోజనకారిగా ఉంటుంది. హువావేలో కూడా ఫేస్‌బుక్ వంటివి ప్రీ-ఇన్‌స్టాల్‌గా ఉంటాయి. కానీ ఫేస్‌బుక్ ఇప్పుడు షాకిచ్చింది. దీనిపై హువావే స్పందించాల్సి ఉంది.

ప్రస్తుతం హువావే ఫోన్స్ కొనేవారికి ఫేస్‌బుక్ ప్రీ ఇన్‌స్టాల్‌ యాప్‌గా లభించదు. అయితే, గూగుల్ ప్లే స్టోర్‌ నుంచి వారు యాప్‌ను డౌన్‌లోడ్‌ చేసుకోవచ్చు. కానీ, గూగుల్ నిర్ణయం ప్రకారం 90 రోజుల తర్వాత ప్లేస్టోర్ యాక్సెస్‌ను కూడా హువావే కొత్త ఫోన్లకు ఇవ్వదు.