రాత్రి తొమ్మిదిన్నర వరకు విచారణ

మంగళవారం సాయంత్రం నుంచి రాత్రి తొమ్మిదిన్నర గంటల వరకు రవిప్రకాశ్‌ను ఏసీపీ శ్రీనివాస్ కుమార్ ఆధ్వర్యంలోని పోలీసు బృందం విచారించింది. ఈ రోజు (బుధవారం, 5, మే)కూడా ఆన విచారణకు హాజరు కానున్నారు. రవిప్రకాశ్ విచారణకు సహకరించారని తెలుస్తోంది. రవిప్రకాశ్ సహకరిస్తున్నాడని, అలాగే, సినీ నటుడు శివాజీకి కూడా సీఆర్పీసీ 41ఏ కింద నోటీసులు ఇచ్చామని, కోర్టు అనుమతితో చర్యలు తీసుకుంటామని పోలీసులు తెలిపారు. వీరికి తొలుత రెండుసార్లు 160 సీఆర్పీసీ కింద, మరో రెండుసార్లు 41 సీఆర్పీసీ కింద నోటీసులు ఇచ్చారు.

ఆధారాలపై ఆరా

పుదుచ్చేరి రిజిస్ట్రేషన్ కలిగిన కారులో (పీవై05సీ0055) రవిప్రకాశ్ సైబర్ క్రైం పోలీస్ స్టేషన్‌కు వచ్చాడు. దాదాపు ఐదు గంటల పాటు అతనిని పోలీసులు విచారించారు. టీవీ9 మాతృసంస్థ ఏబీసీఎల్‌లో వాటాలు కొనుగోలు చేసిన అలంద మీడియా రవిప్రకాశ్ పైన పోలీసులకు ఫిర్యాదు చేసింది. వాటాల విషయంలో తప్పుడు పత్రాల సృష్టించిన ఆరోపణలు, నటుడు శివాజీ పాత్ర వంటి అంశాలపై పోలీసులు ప్రశ్నించారని తెలుస్తోంది. ఇదివరకు తమ విచారణలో సేకరించిన ఆధారాలపై వారు ఆరా తీశారు. గతంలో మూర్తి సహా పలువురిని విచారించారు. వాటి ఆధారంగా ప్రశ్నించారు.

రవిప్రకాశ్ కారుపై చలానా

రవిప్రకాశ్ పుదుచ్చేరి రిజిస్ట్రేషన్ కలిగిన కారులో వచ్చారు. ఈ కారు పైన పలు ట్రాఫిక్ చలాన్లు ఉన్నాయి. ఔటర్ రింగ్ రోడ్డుపై గత నెల 4న అతివేగంతో ప్రయాణించినందుకు రూ.వెయ్యి జరిమానా విధించారు. అలాగే, అంతకుముందు రూ.2,500 జరిమానా చెల్లించారు.

రవిప్రకాశ్ కీలక వ్యాఖ్యలు

విచారణ అనంతరం రవిప్రకాశ్ మీడియాతో మాట్లాడాడు. తనపై దొంగ కేసులు పెట్టారని విమర్శించాడు. ఇది మాఫియా - మీడియా మధ్య యుద్ధమని అభివర్ణించాడు. జర్నలిజమే గెలుస్తుందన్నాడు. 'TV9 చానెల్‌ను ఇద్దరు ధనికులు అక్రమంగా కొనుగోలు చేశారు. నాపై దొంగ కేసులు పెట్టారు. నిబంధనలకు విరుద్ధంగా బోర్డ్ మీటింగ్ నిర్వహించి నన్ను అక్రమంగా TV9 నుంచి బయటికి పంపించారు. విలువలకు... అవినీతికి, మాఫియాకు... మీడియాకు మధ్య ధర్మపోరాటం కొనసాగుతోంది. ఈ యుద్ధంలో జర్నలిజమే గెలుస్తుంది. సత్యం, వాస్తవం, సమాజహితం కోసం పోరాడుతాను. పోలీసుల విచారణకు సహకరించాను. వాళ్లు అడిగిన ప్రశ్నలకు సమాధానం చెప్పాను. మాఫియాకు, మీడియాకు జరుగుతున్న పోరాటంలో ధర్మం గెలుస్తుంది. నాకు మద్దతిస్తున్న వారికి థ్యాంక్స్' అని రవిప్రకాశ్ అన్నాడు.