ఉబెర్, ఓలా లకు తగ్గుతున్న ఆదరణ?

గత ఆరు నెలల్లో ఇదీ పరిస్థితి

గత ఆరు నెలల్లో రోజువారీ రైడ్స్ కేవలం 4% మాత్రమే పెరిగి 35 లక్షల నుంచి 36.5 లక్షలకు చేరుకొన్నాయట. 2016 లో 90% వృద్ధి నమోదు కాగా, 2017 లో 57%, 2018 లో 20% వృద్ధి నమోదు అవ్వగా, ఇప్పుడు కేవలం 4% వృద్ధికి పరిమితం అవ్వడం పరిస్థితికి అడ్డం పడుతోందని ది ఎకనామిక్ టైమ్స్ పేర్కొంది.

బెంగళూరులో క్యాబ్ డ్రైవర్లు 25-30% తగ్గారట. మూడు నాలుగు ఏళ్ళ క్రితం నెలకు దాదాపు రూ 90,000 సంపాదించే అవకాశం ఉందంటూ ఉబెర్, ఓలా సంస్థలు ఊదర కొట్టడంతో ఈ రంగంలోకి కొత్తగా చాలా మంది డ్రైవర్లుగా రంగ ప్రవేశం చేసారు. కొంత కాలం అంత బాగున్నట్లు ఉన్నప్పటికీ పోటీ విపరీతంగా పెరిగి పోయింది.

క్యాబ్‌ల విక్రయం

దీంతో రెండు సంస్థలు ఆఫర్లు కూడా బాగానే ఇచ్చాయి. అప్పటి వరకు ఆటో వాళ్ళతో బేరం ఆడుకొని ప్రయాణించే ప్యాసింజర్లకు తక్కువ ధరలోనే ఏసీ కార్లలో తిరిగే అవకాశం లభించింది. కానీ, ఉబెర్, ఓలా కంపెనీలకు భారీగా నష్టాలు వచ్చాయి. దీంతో ఈ కంపెనీల్లో పెట్టుబడులు పెట్టిన సంస్థలు వాటిపై ఒత్తిడి తేవడం మొదలు పెట్టాయి. ఆ ప్రభావం డ్రైవర్ల కమిషన్లపై, ఆఫర్లపై పడింది. ఒక్కసారిగా పరిస్థితిలో మార్పు చోటుచేసుకుంది. కమిషన్లు తగ్గటంతో ఈఎంఐ కట్టలేక చాలామంది డ్రైవర్లు క్యాబ్లను విక్రయించడం లేదా వేరే వారికి అప్పగించి ఎదో ఒక ఉద్యోగం చూసుకొంటున్నారు.

మెట్రో రైలు రావడమూ ఓ కారణం

ముఖ్యంగా హైదరాబాద్ నగరంలో మెట్రో రైలు పూర్తిస్థాయిలో అందుబాటులోకి రావడం కూడా క్యాబ్లకు ఆదరణ తగ్గేందుకు కారణం అయిందని విశ్లేషకులు పేర్కొంటున్నారు. గత 3-4 నెలలుగా దేశవ్యాప్తంగా పాసెంజర్, కమర్షియల్ వాహనాల విక్రయాలు మందగించడం కూడా ఈ ట్రెండ్ ను సూచిస్తోంది. ఒక్క మహారాష్ట్ర లోనే వాహనాల విక్రయాలు గత నెలలో దాదాపు సగానికి తగ్గాయట.

రోజువారీ రైడ్లు తగ్గడంతో ఉబెర్, ఓలా ఓంపెనీలు ఫుడ్ డెలివరీ వంటి కొత్త తరహా వ్యాపారాల్లోకి ప్రవేశించిన అక్కడ కూడా నష్టాలే వస్తుండటం ఈ రంగంలో కొనసాగుతున్న మందగమనానికి సూచనగా నిలుస్తోంది.