రూ.1000 కోట్ల వడ్డీ చెల్లించేందుకు నో క్యాష్!

మ్యూచువల్ ఫండ్స్ వణుకు

గృహ రుణాల విభాగంలో ఇంతకాలం ప్రధానంగా ఉన్న ఈ సంస్థ గతేడాది నుంచి చతికిలపడింది. ప్రమోటర్లపై ఆరోపణలు, ఐఎల్ఎఫ్ఎస్ సంక్షోభం వంటివి మరింత ఇబ్బందుల్లోకి నెట్టాయి. గతేడాది జూన్ నెలలో ఈ సంస్థ సుమారు రూ.11 వేల కోట్ల విలువైన నాన్ కన్వర్టబుల్ డిబెంచర్స్ (ఎన్.సి.డి)ను 8.90 - 9.10 శాతం వడ్డీతో స్వీకరించింది. ఈ బాండ్లను యాక్సిస్ బ్యాంక్, ఇండస్ ఇండ్ బ్యాంక్‌, యూటీఐ మ్యూచువల్ ఫండ్ సహా మరికొంత మంది ఇన్వెస్టర్లు కొనుగోలు చేశారు. ఇప్పుడు సదరు బాండ్లకు వడ్డీ చెల్లించాల్సిన సమయమొచ్చింది. కానీ రూ.1000 కోట్ల ఆ వడ్డీ సొమ్మును చెల్లించేందుకు ఇప్పుడు డిహెచ్ఎఫ్ఎల్ దగ్గర మాత్రం నిధులు లేవు. ఈ వార్తలు మరోసారి ఇండస్ట్రీని కుదిపేస్తున్నాయి. ఎందుకంటే మ్యూచువల్ ఫండ్ సంస్థలు తమ సబ్‌స్క్రైబర్లకు డబ్బులు చెల్లించాల్సి ఉంటుంది కాబట్టి ఈ పరిస్థితిని ఎలా ఎదుర్కోవాలనే అంశాన్ని ఆలోచించే పనిలోపడ్డాయి.

డిహెచ్ఎఫ్ఎల్ ఏం చెబ్తోంది

ఈ వ్యవహారంపై డిహెచ్ఎఫ్ఎల్ వాదన మరోలా ఉంది. డిలే అయ్యింది కానీ డిఫాల్ట్ మాత్రం కాలేదు కదా అని సంస్థ వాదిస్తోంది. వారం రోజుల గ్రేస్ సమయం తమకు ఉంటుందని ఆ లోపు సర్దుబాట్లు చేస్తామని ధీమాగా చెబ్తోంది. డిబెంచర్ ట్రస్ట్ డీడ్ ప్రకారం వారం రోజుల పాటు రుణగ్రహీతకు సమయం దొరుకుతుంది. అయితే ఈ లోపు వడ్డీని చెల్లించాల్సి ఉంటుంది. దీన్ని ఆసరాగా తీసుకుని గడువు కోరుతోంది దివాన్ హౌసింగ్.

అయితే ఇప్పటికిప్పుడు దివాన్ హౌసింగ్‌కు అంత సొమ్ము ఎవరు అప్పుగా ఇస్తారు అనేదే అనుమానంగా ఉంది. ఈ మధ్యే ఈ సంస్థ వాణిజ్య రుణపత్రాలకు ఏ4ప్లస్ నుంచి ఏ3ప్లస్‌కు రేటింగ్‌ను తగ్గించింది క్రిసిల్ రేటింగ్ ఏజెన్సీ. ఈ తరుణంలో అంత రిస్క్ తీసుకుని ఎవరు రుణమిస్తారనే భయం మ్యూచువల్ ఫండ్స్, ఇన్వెస్టర్స్‌, షేర్ హోల్డర్స్‌లో ఉంది.

ఓక్‌ట్రీ డీల్

అమెరికా దేశానికి చెందిన ఓక్ ట్రీ క్యాపిటల్ అనే సంస్థతో చర్చలు జరుపుతోంది డిహెచ్ఎఫ్ఎల్. రూ.17000 నుంచి 18000 కోట్ల విలువైన రిటైల్ హౌసింగ్ లోన్లను గంపగుత్తగా వాళ్లకు బదలాయించాలని చూస్తోంది. త్వరలో ఈ డీల్ పూర్తి కావొచ్చని యాజమాన్యం చెబ్తోంది. ఇదే జరిగితే సంస్థకు ఎంతో కొంత ఊరట దక్కుతుంది.