గూడ్స్ అండ్ సర్వీస్ ట్యాక్స్ (GST) వసూళ్లు వరుసగా మూడో నెల లక్ష కోట్లు రూపాయలు దాటాయి. మార్చి, ఏప్రిల్ నెలల్లో జీఎస్టీ వసూళ్లు లక్ష కోట్లు దాటిన విషయం తెలిసిందే. మే నెలలో కూడా రూ.1,00,289 కోట్లు వచ్చాయి. ఈ మేరకు శనివారం ఆర్థిక శాఖ విడుదల చేసింది. అయితే ఏప్రిల్ నెలతో పోల్చుకుంటే జీఎస్టీ వసూళ్లు తగ్గాయి. మార్చి ఆర్థిక సంవత్సరం ముగింపు కావడంతో ఏప్రిల్ నెలలో ఎక్కువ వసూళ్లు ఉంటాయి. ఏప్రిల్ నెలలో రికార్డ్ స్థాయిలో దాదాపు రూ.1,14 కోట్లు వసూలైంది. మార్చి నెలలో రూ.లక్షా ఆరువేల కోట్లకు పైగా వసూళ్లు అయ్యాయి.

గత ఏడాది (2018) మే నెలతో పోల్చుకుంటే ఈ మే నెలలో జీఎస్టీ వసూళ్లు 6.67 శాతం ఎక్కువ. ఇందులో సెంట్రల్ జీఎస్టీ రూ.17,811 కోట్లు, స్టేట్ జీఎస్టీ రూ.24,462 కోట్లు, ఇంటిగ్రేటెడ్ జీఎస్టీ రూ.49,891 కోట్లు, సెస్ వసూళ్లు రూ.8,125 కోట్లు. సెస్ వసూళ్లలో రూ.953 కోట్లు ఇంపోర్ట్స్ కలెక్షన్స్ కూడా ఉన్నాయి.

మరోవైపు, మే నెల్లో 72.45 లక్షల మంది జీఎస్టీఆర్ 3బీ రిటర్స్ దాఖలు చేశారు. 2018-19 ఆర్థిక సంవత్సరంలో జీఎస్టీ వసూళ్లు సరాసరి నెలకు రూ.98,114 కోట్లుగా ఉంది. 2017-18 కంటే 9.2 శాతం పెరిగింది. 2018-19 ఆర్థిక సంవత్సరం సరాసరి (రూ.98,114)తో పోల్చితే మే నెలలో2.21 శాతం వసూళ్లు ఎక్కువగా ఉంది.