టిక్ టాక్.. ఈ పేరు వినని యూత్ ఉండరేమో. యువతను అంతగా ఆకట్టుకున్న టిక్ టాక్ యాప్‌కు రోజురోజుకీ ఆదరణ పెరుగుతోంది. చిన్నాపెద్ద తేడా లేకుండా అందరూ ఇందులో వీడియోలు చేస్తున్నారు. చూస్తున్నారు. అయితే ఈ యాప్‌ను రూపొందించిన కంపెనీ త్వరలోనే స్మార్ట్ ఫోన్ రిలీజ్ చేసేందుకు సిద్ధమవుతున్నట్లు తెలుస్తోంది. ఇది టిక్ టాక్ యూజర్ల సంతోషాన్ని మరింత పెంచింది.

టిక్ టాక్ మాతృ సంస్థ బైట్ డ్యాన్స్ సొంతంగా స్మార్ట్ ఫోన్ తయారీలో నిమగ్నమైనట్లు తెలుస్తోంది. ఈ డివైజ్‌కు టిక్ టాక్ ఫోన్ అని పేరు పెట్టాలని నిర్ణయించారు. ఇందులో టిక్ టాక్‌తో పాటు న్యూస్ ఫీడ్స్, గేమ్స్ తదితర బైట్ డ్యాన్స్ యాప్స్ ఉండనున్నట్లు తెలుస్తోంది. స్మార్ట్ ఫోన్ రంగంలోకి అడుగుపెట్టాలని భావిస్తున్న ఈ సంస్థ.. ఇప్పటికే ఓ ఫోన్ తయారీ కంపెనీతో ఒప్పందం కుదుర్చుకున్నట్లు తెలుస్తోంది. ఇప్పటికే కొన్ని పేటెంట్ హక్కులు కూడా సంపాదించినట్లు సమాచారం. అయితే ఈ వార్తల్లో నిజం ఎంతన్నది అసలు ఫోన్ మార్కెట్‌లోకి వస్తుందా రాదా అన్న దానిపై ఎలాంటి స్పష్టత లేదు. ఒకవేళ మార్కెట్‌లోకి వచ్చినా టిక్‌టాక్ ఫేమస్ అయిన భారత్, చైనాలోనే వాటిని రిలీజ్ చేస్తారా అనేది ప్రస్తుతానికి సస్పెన్స్.

ఆశ్లీలత, విద్వేషాలను రెచ్చగొడుతుందన్న విమర్శల నేపథ్యంలో భారత్‌లో ఇటీవలే టిక్ టాక్ యాప్పై నిషేధం విధించారు. మద్రాస్ హైకోర్టు బ్యాన్‌పై స్టే విధించేందుకు నిరాకరించడంతో బైట్ డ్యాన్స్ సుప్రీంకోర్టును ఆశ్రయించింది. సుప్రీంకోర్టు ఆదేశాల మేరకు మద్రాస్ హైకోర్టు నిషేధం ఎత్తివేసింది.