ఎయిరిండియా దేశీయ, విదేశీ రూట్లలో వచ్చే నెల నుంచి కొత్త విమాన సర్వీసులను నడపనుంది. ఈ మేరకు రెండు రోజుల క్రితం ఎయిరిండియా ప్రకటించింది. ముంబై - దుబాయి - ముంబై మార్గంలో వారానికి 3500 సీట్ల సర్వీస్‌ను పెంచనున్నట్లు తెలిపింది. జూన్ 1వ తేదీ నుంచి ఈ సర్వీసులు నడపనున్నారు. జూన్ 2వ తేదీ నుంచి ఢిల్లీ-దుబాయి-ఢిల్లీ మార్గంలో నడపనున్నారు.

వేసవి సెలవుల నేపథ్యంలో జూన్ 1 నుంచి వారానికి అదనంగా 3,500 సీట్లను ముంబై-దుబాయ్‌-ముంబై మార్గంలో, జూన్‌ 2 నుంచి వారానికి అదనంగా 3,500 సీట్లను ఢిల్లీ-దుబాయ్‌-ఢిల్లీ మార్గంలో రెండు కొత్త బీ787 డ్రీమ్‌లైనర్ల ద్వారా అందుబాటులోకి తెస్తున్నామని ఎయిరిండియా ప్రకటించింది. ప్రమోషనల్‌ ధరల్లో భాగంగా 2019 జూలై 31 వరకు దుబాయ్‌కు ఒకవైపు ఎకానమీ క్లాస్‌ ధరను రూ7,777గా నిర్ణయించింది.

దేశీయంగా ఢిల్లీ-భోపాల్‌-ఢిల్లీ రూట్లలో వారానికి 14 విమాన సర్వీసుల నుంచి 20 విమాన సర్వీసులకు అదేవిధంగా ఢిల్లీ-రాయ్‌పూర్‌-ఢిల్లీ రూట్‌లో ఉన్న వారానికి ఏడు విమాన సర్వీసులను వారానికి 14 విమాన సర్వీసులకు పెంచనున్నట్లు తెలిపింది. ఢిల్లీ-బెంగళూరు-ఢిల్లీ, ఢిల్లీ-అమృత్‌సర్-ఢిల్లీ, చెన్నై-అహ్మదాబాద్-చెన్నై, చెన్నై-కోల్‌కతా-చెన్నై మార్గాల్లోను విమానాలను పెంచనున్నట్లు తెలిపింది. ఢిల్లీ-వదోదర-ఢిల్లీ, ముంబై-వైజాగ్-ముంబై మార్గంలోను పెంచనున్నట్లు ప్రకటించింది.