ప్రత్యర్థులకు లాభం

ప్రపంచవ్యాప్తంగా లక్షలాది మంది హువావే ఫోన్ వినియోగదారులు ఉన్నారు. చైనా - అమెరికా వాణిజ్య యుద్ధం నేపథ్యంలో అమెరికా, గూగుల్... హువావేపై తీసుకున్న నిర్ణయం హువావే ఫోన్ యూజర్లను ఆందోళనకు గురి చేస్తోందని అంటున్నారు. గూగుల్ సేవలు లేని హువావే ఫోన్ కొనుగోలు చేసేందుకు ఎవరూ ఆసక్తి చూపరని చెబుతున్నారు. హువావేకు ఇప్పటికే శాంస్‌సంగ్, షియోమి, ఒప్పోల నుంచి గట్టి పోటి ఉంది. హువావేపై అమెరికా నిషేధం ప్రత్యర్థి కంపెనీలకు లాభించనుంది. కొనుగోలుదారులను ఆకట్టుకునేందుకు ఏ మొబైల్ కంపెనీ అయినా వినూత్న ఫీచర్లతో స్మార్ట్ ఫోన్ తయారు చేస్తోంది. ఎన్ని ఫీచర్లు జోడించినా గూగుల్ అందించే ఆండ్రాయిడ్ వర్షన్‍‌ పైనే పని చేస్తాయి.

గూగుల్ సేవలు లేని హువావే

భారత్ సహా దాదాపు అన్ని దేశాల్లో జీ-మెయిల్, యూట్యూబ్, మ్యాప్స్, డ్రైవ్‌లు ఇలా గూగుల్ అందించే సేవలను విస్తృతంగా వినియోగిస్తారు. ఇవి లేని ఫోన్లు చాలా చాలా అరుదు. కాబట్టి గూగుల్ సేవలు లేని హువావే ఫోన్లను కొనుగోలు చేసేందుకు కొనుగోలుదారులు ఆసక్తి చూపించరనే అభిప్రాయాలు వ్యక్తమవుతున్నాయి. ఇది హువావేకు చాలా పెద్ద సమస్య. ఇదే పరిస్థితి కొనసాగితే హువావే ఫోన్ల తయారీ భారీగా పడిపోవచ్చునని భావిస్తున్నారు. కేవలం చైనాలో మాత్రమే హువావే మనుగడ సాగించగలదు. హువావే పరిస్థితి ఇలాగే ఉంటే భవిష్యత్తులో ఈ ఫోన్ పేపర్ వెయిట్‌లా మాత్రమే ఉపయోగపడుతుందని అంటున్నారు. గూగుల్ సేవలు లేని ఫోన్ల వినియోగానికి ఎక్కువ మంది ఆసక్తి చూపరని అంటున్నారు. హువావే ఫోన్లపై చైనాలో అంతగా ప్రభావం పడదని, కానీ మిగతా దేశాల్లో మాత్రం అమెరికా బ్లాక్ లిస్ట్ ప్రభావం ఉంటుందని కౌంటర్ పాయింట్ రీసెర్చ్ వెల్లడించింది.

వినియోగదారుల ఆందోళన

హువావే ఫోన్లపై గూగుల్ సేవలు నిలిపివేయడంతో ఓ వినియోగదారుడు ట్విట్టర్ వేదికగా తన ఆందోళన వ్యక్తం చేశాడు. తాను పీ30ప్రో ఫోన్ ఉపయోగిస్తున్నానని, నెల రోజుల క్రితమే కొనుగోలు చేశానని ఆందోళన వ్యక్తం చేయగా, గూగుల్ అధికార ప్రతినిధి స్పందిస్తూ... రానున్న 90 రోజులు కూడా హువావేకు తాము అన్ని సేవలు కొనసాగిస్తామని వెల్లడించారు. మే 16వ తేదీకి ముందు గూగుల్ సర్టిఫైడ్ అన్ని హువావే ఫోన్లకు గూగుల్ ప్లే స్టోర్ యాక్సెస్ ఉంటుందని, ఇతర ప్రీలోడెడ్ యాప్స్, సేవల యాక్సెస్ కూడా ఉంటుందట. ఇది గూగుల్, యూజర్లకు మధ్య ట్రాన్సాక్షన్ అని, కానీ గూగుల్, హువావేకు కాదని వెల్లడించింది. అయితే, సాఫ్టువేర్ బగ్స్, గూగుల్ వర్షన్ ఇతర టెక్నికల్ ఫిక్సెస్‌పై కలిసి పని చేసేందుకు సిద్ధంగా లేదు. దీంతో హువావే సొంతగా డెవలప్ చేయవలసి ఉంటుంది. మే 16వ తేదీన కొనుగోలు చేసిన హువావే ఫోన్ వినియోగదారులకు గూగుల్ సపోర్ట్ ఉండదు.