న్యూఢిల్లీ: ఇన్ఫోసిస్ ఫౌండేషన్‌కు హోమ్ మంత్రిత్వ శాఖ షాకిచ్చింది. బెంగళూరు కేంద్రంగా నడుస్తున్న ఈ ఫౌండేషన్ రిజిస్ట్రేషన్‌ను హోమ్ మినిస్ట్రీ శాఖ రద్దు చేసింది. విదేశీ నిధుల స్వీకరణలో నిబంధనలు ఉల్లంఘించినందుకు ఈ నిర్ణయం తీసుకున్నట్లుగా అధికారులు తెలిపారు. విదేశీ ఫండ్స్ రావాలంటే నాన్ గవర్నమెంట్ ఆర్గనైజేషన్ (ఎన్జీవో)లు తప్పనిసరిగా ఫారన్ కాంట్రిబ్యూషన్ (రెగ్యులేషన్) యాక్ట్ (FCRA) కలిగి ఉండాలి. ఇప్పుడు దీనిని హోంశాఖ రద్దు చేసింది.

ఇన్ఫోసిస్ ఫౌండేషన్ ఈ రిజిస్ట్రేషన్ కలిగి ఉంది. కానీ FCRA నిబంధనల ప్రకారం రిజిస్టర్ అయిన స్వచ్చంధ సంస్థలు తమ వార్షిక ఆదాయాన్ని, విదేశీ నిధుల వ్యయాలను, బ్యాలెన్స్ షీట్ వివరాలు సమర్పించాలి. విదేశాల నుంచి విరాళాలు రాకపోతే నిల్ రిటర్న్స్ సమర్పించాల్సి ఉంటుంది.

ఇన్ఫోసిస్ ఫౌండేషన్ గత ఆరేళ్లుగా తమ ఆదాయ, వ్యయాలను వెల్లడించడం లేదు. దీంతో నోటీసులు జారీ అయ్యాయి. గత ఏడాది షోకాజ్ నోటీసులు జారీ చేశారు. ఆరేళ్లుగా ఆదాయ వ్యయాలు సమర్పించనందుకు పోయిన సంవత్సరం షోకాజ్ నోటీసులు జారీ చేసినట్లు ఓ అధికారి వెల్లడించారు.

ఇన్ఫోసిస్ ఫౌండేషన్ స్పందించకపోయేసరికి ఇప్పుడు రిజిస్ట్రేషన్‌ను రద్దు చేస్తూ హోంశాఖ నిర్ణయం తీసుకుంది. ఈ విషయాన్ని ఇన్ఫోసిస్‌ ఫౌండేషన్‌ కూడా ధ్రువీకరించింది. ఇన్ఫోసిస్‌ ఫౌండేషన్‌ను 1996లో స్థాపించారు. సుధామూర్తి దీనికి ఛైర్‌పర్సన్‌గా ఉన్నారు. కాగా, కేంద్ర హోంశాఖ గత ఏడాది దాదాపు 1755 ఎన్జీవోలకు షోకాజ్ నోటీసులు జారీ చేసింది. ఇందులో పలు కంపెనీలు కూడా ఉన్నాయి.