భారత కార్పోరేట్ రంగంలో సంచలనం సృష్టించిన మైండ్ ట్రీ టేకోవర్ సస్పెన్స్ థ్రిల్లర్‌ను తలపిస్తోంది. ఐటీ సేవలు అందించే మైండ్ ట్రీ కంపెనీనిని ఎల్ అండ్ ఇన్ఫోటెక్ బలవంతంగా కొనుగోలు చేసే ప్రక్రియ అనేక మలుపులు తిరుగుతోంది. అనేక వివాదాల మధ్య ఎట్టకేలకు ఎల్ అండ్ ట్రీ కంపెనీ.. మైండ్ ట్రీలో ప్రధాన వాటాదారుగా ఉన్న సిద్ధార్థ, ఆయన సంస్థల నుంచి 20.32 శాతం వాటా కొనుగోలు ఒప్పందం కుదుర్చుకుంది.

కంపెనీపై పూర్తి పట్టి సాధించేందుకు 31 శాతం వాటాకు ఓపెన్ ఆఫర్ ద్వారా ప్రస్తుత రిటైల్, వ్యవస్థాగత వాటాదారుల నుంచి కొనుగోలు చేసేందుకు ప్రయత్నాలు మొదలు పెట్టింది. ఈ మేరకు ఎల్ అండ్ టీ ఓపెన్ ఆఫర్‌ను ప్రకటించింది కూడా. ఈ నెల 14న ప్రారంభమయ్యే ఓపెన్ ఆఫర్ మే 27న ముగియనుంది.

అయితే ఇప్పటి వరకు ఎల్ అండ్ టికి మార్కెట్ నియంత్రణ సంస్థ సెక్యూరిటీస్ అండ్ ఎక్స్‌చేంజ్ బోర్డ్ ఆఫ్ ఇండియా (సెబి) నుంచి అనుమతి లభించలేదు. రేపు అనగా మే 13న సెబీ అనుమతి లభించకపోతే ఎల్ అండ్ టి ఓపెన్ ఆఫర్ ప్రక్రియ ఎలా ముందుకు వెళ్తుందనేది ప్రశ్నార్థకంగా మారింది.

ఒకవేళ సెబీ అనుమతి ఆలస్యమైతే ఓపెన్ ఆఫర్ కూడా ఆ మేరకు ఆలస్యమయ్యే అవకాశాలను కొట్టి పారేయలేమని మార్కెట్ విశ్లేషకులు అంటున్నారు. ఎల్ అండ్ టి మొత్తంగా 66 శాతం వాటాను కొనే ప్రయత్నం చేసింది. తద్వారా మైండ్ ట్రీ పైన పూర్తిస్థాయి ఆధిపత్యం చెలాయించాలని చూస్తోంది.