జీఎస్టీ వసూళ్లలో నవ్యాంధ్ర గత ఏడాది కంటే ఈసారి దాదాపు రెండింతలు అయింది. 2017-18 (9 నెలలకు) ఆర్థిక సంవత్సరంలో 10,826.28 కోట్లు ఉండగా, 2018-19 ఆర్థిక సంవత్సరంలో రూ.20,746.12 కోట్లుగా ఉంది. అంటే గత ఏడాదితో పోలిస్తే 27.75 శాతం ఎక్కువ.

వే-బిల్లుల చెల్లింపు, చెల్లింపుదారుల నుంచి సంవత్సరాలవారీగా చేపడుతున్న వసూళ్లలో వ్యత్యాసాలను గుర్తించి తగిన చర్యలు తీసుకోవడం, ఇతర విధానాల వల్ల ఏపీ ముందంజలో ఉందని అధికారులు తెలిపారు.

నష్టపరిహారం అవసరం లేని చిన్న రాష్ట్రాలైన మిజోరాం, అరుణాచల్ ప్రదేశ్, మణిపూర్, నాగాలాండ్, సిక్కిం రాష్ట్రాల సరసన ఏపీ నిలిచింది. తెలంగాణ సహా పలు రాష్ట్రాలు కేంద్రం నుంచి ఇంకా నష్టపరిహారం అందుకుంటున్నాయి. జీఎస్టీ అమలుతో నష్టపోయే రాష్ట్రాలకు నిర్దేశిత ప్రమాణాలను అనుసరించి కేంద్రం అయిదేళ్ల పాటు పరిహారం ఇస్తుంది. పురోగతి బాగున్న రాష్ట్రాలకు కేంద్రం నుంచి పరిహారం అందదు. ఇందులో చిన్నరాష్ట్రాలు ముందంజలో ఉన్నాయి.