కుటుంబ విబేధాలు

రూహ్ అప్ఝా సిరప్‌ను హందర్ద్ ల్యాబ్స్‌ తయారు చేస్తోంది. వివిధ ఆయుర్వేద మూలికలకు తోడు రోజా పువ్వు సుగంధంతో ఈ షుగర్ సిరప్‌ను తయారు చేస్తోంది. అయితే గత కొద్ది కాలం నుంచి ఇది అందుబాటులో లేదని సోషల్ మీడియాలో విపరీతమైన చర్చ నడుస్తోంది. అయితే ప్రమోటర్ కుటుంబం మధ్య విబేధాలే కారణమని తాజాగా తెలుస్తోంది. కానీ కంపెనీ యాజమాన్యం మాత్రం వారం రోజుల్లో సరఫరాను పునరుద్ధరిస్తామని, కొన్ని మూలికలు అందుబాటులో లేకపోవడం వల్లే జాప్యానికి కారణమని కవర్ చేసుకుంటోంది.

వాస్తవానికి ఎలాంటి అప్పూ లేకుండా ముందస్తుగానే డబ్బులు చెల్లించి మరీ రూహ్ అప్జాను డీలర్లు బుక్ చేసుకుంటారు. ప్రస్తుతం దేశవ్యాప్తంగా ఈ సంస్థకు నాలుగున్నర లక్షల మంది రీటైలర్లు అందుబాటులో ఉన్నారు. బ్రాండ్ విలువ కూడా సుమారు రూ.400 కోట్ల వరకూ ఉంటుంది. ఏటా ఈ వేసవికాలంలో అమ్మకాలు 25 శాతం ఎక్కువగా ఉంటాయి.

సరఫరా అందుకే తగ్గిందా?

హందర్ద్ సంస్థను హకీం హఫీజ్ అబ్దుల్ మజీద్ ప్రారంభించారు. ఆయన తర్వాత కొడుకులు, మనవళ్లు సంస్థ బాధ్యతను చూసుకుంటున్నారు. తాజాగా హకీం మనుమడు అబ్దుల్ మజీద్.. అతని తమ్ముడు హమ్మద్ మహ్మద్ మధ్య గొడవలు పెరిగాయి. సంస్థపై హక్కుల కోసం ఇద్దరూ పోరాడుతున్నారు. ఈ ఆధిపత్య పోరులో సంస్థ నిర్వాహణను గాలికొదిలేయడంతో సరఫరా ఇబ్బందులు తలెత్తాయని తెలుస్తోంది.

రూ.1000 కోట్ల మార్కెట్

ప్రస్తుతం మన దేశంలో ఇలాంటి సిరప్స్ డ్రింక్ మార్కెట్ సుమారు రూ.1000 కోట్ల వరకూ ఉంటుందని ఓ అంచనా. అయితే ఇందులో కూడా 40 శాతానికి పైగా వాటను రూహ్ అప్జా కొల్లగొట్టింది. అంతటి పటిష్ట మార్కెట్‌ను సొంతం చేసుకోవడంతో సక్సెస్ సాధించడంతో పాటు నిరంతరాయంగా తన మార్కెట్‌ను వృద్ధి చేసుకుంటూ వస్తోంది. ఇఫ్తార్‌తో కంపల్సరీ డ్రింక్ కావడంతో ఇప్పుడీ విషయం సోషల్ మీడియాలో కూడా వైరల్‌గా మారింది. గత నవంబర్ నెలలో ఉత్పత్తి ఆగిపోయినట్టు సమాచారం. మళ్లీ ఏప్రిల్ మధ్యలో పునరుద్ధరణ జరిపినా డిమాండ్‌కు తగ్గట్టు సప్లై మాత్రం లేదని తెలుస్తోంది. నెలలునెలలుగా పేరుకుపోయిన పెండింగ్ ఆర్డర్లకు తోడు తాజా సీజన్ నేపధ్యంలో ఒక్కసారిగా ఒత్తిడి పెరిగింది. యాజమాన్యం మధ్య విబేధాలు కూడా ఉద్యోగుల్లో ఆందోళన పెంచినట్టు తెలుస్తోంది.