ఢిల్లీ: ఫని తుఫాను ఒడిశా సహా తీర ప్రాంత ప్రాంతాలను వణికిస్తోంది. భారీ ఎత్తున ఆస్తి నష్టం సంభవించింది. పలువురు ప్రాణాలు కోల్పోయారు. శుక్రవారం ఫని తుఫాను ఒడిశాపై తీవ్ర ప్రభావం చూపింది. పలు విమానాశ్రయాల్లో ప్రయాణీకులు చిక్కుకుపోయారు. ఒడిసశా రాజధాని భువనేశ్వర్, పశ్చిమ బెంగాల్ రాజధాని కోల్‌కతా విమానాశ్రయాల నుంచి విమానాల రాకపోకలు ఉండవని ఇండియన్ ఏవియేషన్ రెగ్యులేటర్ డీజీసీఏ వెల్లడించింది. ప్రయాణీకుల భద్రత కోసం, వారికి అసౌకర్యం కలగకుండా ఉండేందుకు విమానాలు రద్దు చేసినట్లు ప్రకటించింది. పరిస్థితి సద్దుమణిగాక విమానాల రాకపోకలు ఉంటాయని తెలిపింది.

ఢిల్లీలోని ఇందిరాగాంధీ ఇంటర్నేషనల్ విమానాశ్రయంలో ఎయిరిండియాకు చెందిన ప్రయాణీకులు చిక్కుకుపోగా, వారికి అకామిడేషన్ నిరాకరించారని తెలుస్తోంది. ఫని తుఫాను కారణంగా విమానాల రాకపోకలు నిలిచిపోయాయని, ఇది యాక్ట్ ఆఫ్ గాడ్, అందుకే ప్రయాణీకులకు అకామిడేషన్ కల్పించలేమని ఎయిర్ ఇండియా అధికారులు వెల్లడించారని తెలుస్తోంది.

అంతకుముందు రోజు కేంద్రమంత్రి సురేష్ ప్రభు ఫని తుఫాను అంశంపై స్పందిస్తూ... అన్ని విమానయాన సంస్థలు ప్రయాణీకులకు అన్ని సౌకర్యాలు కల్పించాలని చెప్పారు. ఫని తుఫాను కారణంగా చిక్కుకుపోయిన వారికి అన్ని రకాలుగా సహాయ సహకారాలు అందిస్తామని, కంట్రోల్ రూమ్, హెల్ప్ లైన్ కూడా అందుబాటులోకి తీసుకు వచ్చామని చెప్పారు. ప్రయాణీకులకు అన్ని విమానయాన సంస్థలు సౌకర్యం కల్పించాలన్నారు.