రుచి సోయాపై అందుకే పతంజలి దృష్టి

రూ.1,700 కోట్ల వర్కింగ్ కేపిటల్ నిధులతో రుచి సోయా కంపెనీకి చెందిన 24 ప్లాంట్లను మళ్లీ ఉత్పత్తికి సిద్ధం చేస్తామని పతంజలి తమ బిడ్‌లో పేర్కొంది. అయితే తమ రుణాల్లో యాభై శాతానికి పైగా వదులుకోవడం బ్యాంకర్లకు ఇబ్బందిగా మారింది. ఈ నెల 7వ తేదీ వరకు గడువు ఇస్తే, మరో పరిష్కార ప్రణాళికతో ముందుకు వస్తామని పతంజలి తెలిపింది. ప్రస్తుతం పతంజలి ఆయుర్వేద్ కంపెనీ.. ఆయుర్వేద్, ఆహార ఉత్పత్తులపై దృష్టి సారించింది. వంట నూనెలు కూడా ఉన్నప్పటికీ అంతగా లేవు. 2030 నాటికి వంట నూనెల మార్కెట్ 3.4 కోట్ల టన్నులకు చేరుకుంటుందని అంచనా. అదానీ గ్రూప్‌కు చెందిన ఫార్చూన్ బ్రాండ్ 19 శాతం వాటా, రుచి సోయా ఐదు బ్రాండ్లతో 14 శాతం వాటాను కలిగి ఉంది. ఇప్పుడు దివాళా పరిష్కార ప్రక్రియలో ఉన్న రుచి సోయాను కొనుగోలు చేసి, వంట నూనెల మార్కెట్లో సత్తా చాటాలని పతంజలి చూస్తోంది.

పతంజలి టార్గెట్

పతంజలి కంపెనీ రెండేళ్ల క్రితం వరకు మంచి వృద్ధి రేటు కలిగి ఉంది. 2016-17 ఆర్థిక సంవత్సరంలో 11 శాతం వృద్ధి రేటుతో రూ.10,561 కోట్ల టర్నోవర్ కలిగి ఉంది. ఆ తర్వాత ఏడాది 20 శాతానికి పడిపోయింది. నోట్ల రద్దు, జీఎస్టీకి తోడు ఇతర కంపెనీలు ఆయుర్వేద ఉత్పత్తులు తీసుకు రావడమే కారణం. 2018-19 ఆర్థిక సంవత్సరంలోను టర్నోవర్ పెద్దగా పెరిగే అవకాశాలు లేవని అంటున్నారు. రానున్న అయిదేళ్లలో రూ.25 కోట్ల టర్నోవర్ లక్ష్యంగా పెట్టుకుంది. రుచి సోయా కూడా ఇందుకు ఉపయోగపడుతుందని భావిస్తోంది. రుచి సోయాకు 24 ప్లాంట్లు ఉన్నాయి. ప్రతి సంవత్సరం 37 లక్షల టన్నుల నూనె గింజల సామర్థ్యం ఉంది. ఆరు వంట నూనెల బ్రాండ్లు ఉన్నాయి. గత రెండున్నర సంవత్సరాలుగా పంతజలి, సోయా మధ్య పలు ఒప్పందాలు ఉన్నాయి.

రుచి సోయా బ్రాండ్స్

రుచి సోయా 15 డిసెంబర్ 2017లో కార్పోరేట్ దివాలా తీర్మాన ప్రక్రియలో చేర్చబడింది. స్టాండర్డ్ చార్డర్డ్ బ్యాంక్, దేనా బ్యాంకు ఫిర్యాదుతో ఇది చోటు చేసుకుంది. రుచి సోయాలో న్యూట్రేలా, సన్‌రిచ్, మహాకోష్, రుచి గోల్డ్, రుచి స్టార్ బ్రాండ్లు ఉన్నాయి.