ఫేస్‌బుక్ చైర్మన్ అండ్ సీఈవో మార్క్ జుకర్ బర్గ్ తన భార్యకు స్లీప్ బాక్స్ తయారు చేశాడు. తన సతీమణి పిల్లలతో తీరిక లేకుండా గడుపుతోందని, వారిని ఆడించడం, తినిపించడం, రాత్రిపూట పిల్లల కారణంగా సరిగా నిద్రకూడా పోవడం లేదని, నిరంతరం పిల్లలతో పని కారణంగా రాత్రివేళల్లో ఆమె సరిగా నిద్రపోవడం లేదని, అందుకే ఆమె కోసం స్లీప్ బాక్స్ తయారు చేశానని చెబుతున్నాడు.

ఈ స్లీప్ బాక్స్ కారణంగా ఆమె హాయిగా నిద్రపోతుందని చెప్పాడు. ఇందుకు సంబంధించి స్లీప్ బాక్స్ ఫోటోను కూడా ఆయన తన ఫేస్‌బుక్ ఖాతాలో పంచుకున్నాడు. తల్లిగా ఉండటం ఎంతో కష్టమైన పని అని, తమ పిల్లలు పుట్టినప్పటి నుంచి ప్రిసిల్లా రాత్రుల్లు సరిగ్గా నిద్రపోవడం లేదని, పిల్లలు లేచే సమయం అయిందోమేనని రాత్రివేళల్లో తన ఫోన్ చూసుకుంటోందని, అలా లేచి నిద్రపోలేక ఒత్తిడికి గురవుతోందని, అందుకోసమే ఆమె కోసం ఇది తయారు చేశానని జుకర్ బర్గ్ చెప్పాడు.

ఈ బాక్స్‌ ఉదయం ఆరు నుంచి ఏడు గంటల మధ్య సన్నని కాంతితో వెలుగుతుందని, ఈ లైట్‌ను ఆమె చూస్తే పిల్లలు లేచే సమయం అయ్యిందని తెలిసిపోతుందని, ఈ బాక్స్‌ సమయాన్ని చూపించదని, ఒకవేళ ఆమె మధ్యరాత్రి లేచినప్పుడు బాక్స్‌ను చూసి ఆమె తిరిగి హాయిగా నిద్రపోవచ్చునని, సమయం గురించి ఆలోచించాల్సిన అవసరం లేదని, కాబట్టి ఆమెపై ఒత్తిడి ఉండదని, నేను అనుకున్న దానికంటే ఈ బాక్స్ బాగా పని చేస్తోందని చెప్పాడు. ఓ ఇంజినీర్‌గా భార్యకు ఉపయోగపడే పరికరం తయారు చేశానని చెప్పాడు. ఇలాంటి బాక్సులు కావాలని ఫ్రెండ్స్ అడుగుతున్నారని, ఆసక్తికర వ్యాపారులు ఎవరైనా దీనిని తయారు చేయవచ్చునని చెప్పాడు.