IL&FS సంక్షోభం

IL&FS సంక్షోభం ఇటీవల కదిపేసింది. ఈ నేపథ్యంలో దీని ఆడిటర్‌గా ఉన్న డెలాయిట్ పైన కంపెనీల చట్టంలోని 140(5) సెక్షన్ కింద నిషేధం విధించాలని చూస్తున్నట్లుగా వార్తలు వస్తున్నాయి. మోసపూరిత కార్యకలాపాలతోప్రమేయం ఉన్న ఆడిటర్లపై చర్యలకు ఈ సెక్షన్ నేషనల్ కంపెనీ లా ట్రైబ్యునల్ (ఎన్సీఎల్టీ)కి అవకాశం ఇస్తుంది. డెలాయిట్ కనుక నిషేధానికి గురైతే ఇది రెండో అతిపెద్ద కంపెనీ అవుతుంది. అంతకుముందు, సత్యం స్కాం కేసులో ప్రైస్ వాటర్ హౌజ్ కూపర్స్ పైన సెబి నిషేధం విధించింది. అప్పుడు ఈ కంపెనీ రెండేళ్ల పాటు నిషేధం ఎదుర్కోవడంతో పాటు అక్రమంగా ఆర్జించిన 130.9 మిలియన్లకు పై మొత్తాన్ని చెల్లించాలని ఆదేశించింది. పలు కార్పోరేట్ సంస్థల అంచనాలు పెంచడంలో ఆడిటర్లది కీలక పాత్ర. ఆయా సంస్థల ఆర్థిక ఫలితాలను ఎక్కువగా చూపించి, అంచనాలు పెంచుతారు. దీంతో చివరకు మదుపరులు, ఉద్యోగులు నష్టపోయిన సందర్భాలు ఉన్నాయి. సత్యం కంప్యూటర్స్‌లో ఇదే జరిగింది. సత్యం స్కాం వెలుగుచూసిన ఎనిమిదేళ్ల తర్వాత, 2018 జనవరిలో సెబి ప్రైస్ వేర్ హౌస్ పైన చర్యలు తీసుకుంది.

అందుకే డెలాయిట్‌పై ఆరోపణలు

IL&FS రుణ సంక్షోభంలోను ఆడిటర్లపై అనేక అనుమానాలు వస్తున్నాయి. ఈ నేపథ్యంలోనే ఆ కంపెనీ ఆడిటర్ అయిన డెలాయిట్ పనితీరుపై ఆరోపణలు వచ్చాయి. డెలాయిట్ మాత్రం అలాంటిదేమీ లేదని చెబుతోంది. దర్యాప్తు జరుగుతోందని, అధికారులకు అన్నివిధాలా సహకరిస్తున్నామని, నియమ, నిబంధనలను పాటించే ఆడిటింగ్ చేశామని డెలాయిట్ అధికార ప్రతినిధి ఒకరు ఓ ఇంగ్లీష్ పత్రికతో చెప్పారు.

ఆత్మరక్షణలో డెలాయిట్

IL&FS గ్రూప్ సంస్థలకు తాము మాత్రమే ఆడిట్ చేయలేదని, పలు చిన్న సంస్థలు కూడా చేశాయని డెలాయిట్ అంటోంది. మే 2018 నుంచే IL&FS చెల్లింపుల వైఫల్యం ప్రారంభమైందని డెలాయిట్ అంటోంది. IL&FS లోని ఐఎల్ అండ్ ఎఫ్ఎస్, ఐటీఎన్ఎల్, ఏఎఫ్ఐఎన్ సంస్థల ఆడిట్‌లను ఇతర సంస్థలు చేశాయని చెబుతోంది. IL&FS గ్రూపులోని 347 అనుబంధ సంస్థల ఆడిటింగ్‌తో తమకు సంబంధం లేదని తెలిపింది. ఇవి చాలావరకు విదేశాల్లో ఉన్నాయని పేర్కొంది.