దేశంలోని ప్రముఖ కార్ల కంపెనీల తయారుదారీ సంస్థ మారుతీ సుజుకీ లాభాలను పెంచేందుకు ప్రణాళికలు సిద్ధం చేసుకుంటోంది. ఇందులో భాగంగా ఉత్పాదక వ్యయాలకు కళ్లెం వేయడంతో పాటు ఉత్పాదకతను కూడా పెంచి లాభాలను సాధించాలని లక్ష్యంగా పెట్టుకున్నట్లు పేర్కొంది. తాము వ్యయాలను తగ్గించేందుకు తీవ్రంగా ప్రయత్నాలు చేస్తున్నామని, ప్రతి కంపెనీలాగే తాము కూడా లాభాలను పెంచుకుంటామని, ఇందులో భాగంగా స్థానికీకరణ చాలా ముఖ్యమని, ఇఫ్పుడు ఇదే కీలకమని మారుతీ సుజుకీ సీఎఫ్ఓ అజయ్ సేథీ తెలిపారు.

ఒకప్పుడు విదేశీ భాగాలపై ఆధారపడే వాళ్లమని, ఇప్పుడు దేశీయంగానే వాటిని తయారు చేయాలని చూస్తున్నామని, ఇక్కడి నుంచి తాము ఫలితాలు సాధించడానికి కష్టపడాలన్నారు. దీనికోసం ఇప్పటికే పలు రకాల కార్యక్రమాలు చేపట్టామన్నారు.

డీజిల్ ఇంజిన్ ప్లాంట్లను మార్చుకునే విషయంపై కూడా సేథీ స్పందించారు. మరికొన్నేళ్లలో మారుతీ డీజిల్ వాహనాలకు స్వస్తీ చెప్పనుందని వార్తలు వచ్చిన విషయం తెలిసిందే. దీనిపై స్పందిస్తూ.. 99 శాతం డీజిల్ ఇంజిన్ కర్మాగాలను పెట్రోల్, సీఎన్జీ ఇంజిన్ల తయారీ కేంద్రాలుగా మారుస్తామని, అందులో ఎలాంటి ఇబ్బంది లేదన్నారు.