ఆశించినస్థాయిలో లేని జీతాలు

జెట్ ఎయిర్వేస్ తాత్కాలికంగా మూతబడటంతో ఇందులోని 23వేల మంది ఉద్యోగుల భవితవ్యం రోడ్డున పడింది. ఇందులోని చాలామంది నిపుణులను ఇతర విమానయాన సంస్థలు ఉద్యోగంలోకి తీసుకుంటున్నాయి. కానీ తక్కువ వేతనంతో ఎక్కువ అనుభవం కలిగిన ఉద్యోగులను తీసుకుంటోంది. ఎయిర్ లైన్స్‌కు ఇది బంపరాఫర్. పైలట్లు, కేబిన్ సిబ్బంది, ఇంజినీర్లు తక్కువ వేతనాలకు వెళ్తున్నారు. జెట్ ఉద్యోగులు ఇతర సంస్థల వైపు చూస్తున్న ఉద్యోగులకు అవకాశాలు బాగానే వస్తున్నా జీతాలు మాత్రం ఆశించిన స్థాయిలో లేవు. అనుభవం, ప్రతిభ ఉన్నప్పటికీ ఆయా సంస్థలు వీరికి తక్కువ జీతాలనే ఇస్తున్నాయని అంటున్నారు.

ఇతర రంగాల్లోకి కూడా జెట్ ఉద్యోగులు

నాన్‌ మెట్రో నగరాల్లో పని చేసేందుకు సిద్ధపడే జెట్‌ ఉద్యోగులకు మాత్రమే ఇతర ఎయిర్‌లైన్స్‌ దాదాపు జెట్‌ ఎయిర్వేస్ స్థాయిలో జీతాలు ఇచ్చేందుకు సిద్ధమవుతున్నాయట. ద్వితీయ, తృతీయ శ్రేణి నగరాల్లో పని చేయలేమని, మెట్రో నగరాల్లోనే తమకు పోస్టింగ్‌లు కావాలంటే మాత్రం జెట్‌‌లో ఇచ్చిన జీతాల కంటే 30 నుంచి 50 శాతం కోత పెడుతున్నాయట. ఈఎంఐల వంటి పలు కారణాల వల్ల కొత్త ఉద్యోగాల్లో చేరుతున్నారు. జెట్‌‌లో పని చేసిన పైలట్లు, కేబిన్ సిబ్బంది, ఇంజనీర్లు, గ్రౌండ్‌ డ్యూటీ సిబ్బందిలో ఎక్కువ మందికి, ఇతర విమానయాన కంపెనీల్లోనే ఉద్యోగ అవకాశాలు లభిస్తున్నాయి. విమానయానంతో సంబంధం లేని ఇతర ఉద్యోగుల విషయంలోనే కొద్దిగా ఇబ్బంది ఎదురవుతోందట. పలువురు ఇతర రంగాల కంపెనీల్లో ప్రజాసంబంధాలు, కస్టమర్ రిలేషన్స్ మేనేజర్‌వంటి ఉద్యోగాల్లో చేరుతున్నారట.

500 మందిని తీసుకున్న స్పైస్ జెట్

స్పైస్‌జెట్ 500లకుపైగా జెట్ ఉద్యోగులను తీసుకుంది. ఇందులో 200 మందికిపైగా కేబిన్ సిబ్బంది, మరో 200 మందికిపైగా టెక్నికల్, ఎయిర్ పోర్ట్ సిబ్బంది, 100 మంది పైలట్లు ఉన్నారు. మరికొంతమందిని తీసుకుంటామని స్పైస్ జెట్ చెబుతోంది. కొత్త నియామకాల్లో జెట్ ఎయిర్వేస్ ఉద్యోగులకు తొలి ప్రాధాన్యతనిస్తామని స్పైస్‌జెట్ సీఎండీ అజయ్ సింగ్ చెప్పారు. జెట్ ఈక్విటీలో మెజార్టీ వాటా 76 శాతంను తీసుకునేందుకు ఎవరూ ముందుకు రాకుంటే దివాళా ప్రక్రియ కింద ఎన్‌సీఎల్టీని ఆశ్రయించడం కంటే జెట్ ఆస్తులు అమ్మి వచ్చిన సొమ్ములు రాబట్టుకోవాలని చూస్తున్నారట.