వాణిజ్య బ్యాంకులకు వారంలో అయిదు రోజులే వర్కింగ్ డేస్ అంటూ రిజర్వ్ బ్యాంక్ ఆఫ్ ఇండియా (ఆర్బీఐ) ఆదేశాలు ఇచ్చినట్లుగా జోరుగా ప్రచారం జరిగింది. దీనిపై ఆర్బీఐ వివరణ ఇచ్చింది. కమర్షియల్ బ్యాంకులకు వారంలో 5 రోజులు పని దినాలు అని ఎలాంటి ఆదేశాలు జారీ చేయలేదని స్పష్టం చేసింది. పైవిధంగా తాము ఆదేశాలు ఇచ్చినట్లుగా కొన్ని ప్రసార మాధ్యమాల్లో వస్తున్న వార్తలు అవాస్తవమని ఓ ప్రకటనలో తెలిపింది.

ఈ మేరకు శనివారం ప్రకటన విడుదల చేసింది. కాగా, ప్రస్తుతం కమర్షియల్ బ్యాంకులకు ఆదివారాలతో పాటు రెండవ, నాలుగవ శనివారాలు మాత్రమే సెలవులు ఉంటాయి. మిగిలిన శనివారాల్లో రోజువారీ సమయ వేళల ప్రకారమే యథావిధిగా కార్యకలాపాలు నిర్వహిస్తాయి.

బ్యాంకులపై అప్పుడప్పుడు ఇలాంటి అవాస్తవ ప్రచారాలు జరుగుతున్నాయి. గత ఏడాది బ్యాంకులకు వరుసగా 5 రోజులు సెలవు అని సోషల్ మీడియాలో జోరుగా ప్రచారం సాగింది. దీనిపై అప్పుడు బ్యాంకులు వివరణ ఇచ్చే పరిస్థితి వచ్చింది.