వొడాఫోన్ ఐడియా బుధవారం ప్రభుత్వంపై ఆగ్రహం వ్యక్తం చేసింది. లిక్కర్, సిగరేట్ కంపెనీల వలే తమను ట్రీట్ చేస్తున్నారని ఆవేదన వ్యక్తం చేసింది. తమపై కూడా భారీగా పన్నులు విధిస్తున్నారని ధ్వజమెత్తింది. టెలికం సంస్థలపై కస్టమ్స్ డ్యూటీ కింద 23 శాతం, జీఎస్టీ కింద 18 శాతం విధించడం భావ్యం కాదని, ప్రాధాన్యేతర వస్తువులైన లిక్కర్, సిగరేట్లపై విధిస్తున్న పన్ను తరహాలో విధించడం వల్ల తీవ్ర ఇబ్బందులను ఎదుర్కోవాల్సి వస్తుందని వొడాఫోన్ ఐడియా సీఈవో బాలేష్ శర్మ అన్నారు.

భారతదేశంలో టెలికం సేవలు అందించేందుకు స్పెక్ట్రం కోసం భారీస్థాయిలో నిధులు వెచ్చించవలసి వస్తుందని, దీంతో అప్పుల పాలవుతున్నామని పేర్కొన్నారు. వీటితో పాటు స్పెక్ట్రం యూసేజ్ ఛార్జీలు, యూఎస్‌వోఎఫ్ ఛార్జీలను, ఇతర ఛార్జీలను టెలికం సంస్థలపై కేంద్రం భారీగా వడ్డిస్తోందని పేర్కొన్నారు.

వొడాఫోన్ ఐడియాకు రూ.1.2 లక్షల కోట్ల అప్పులు ఉన్నాయి. ఇందులో 80 శాతం స్పెక్ట్రంకు సంబంధించిన చెల్లింపులు ఉన్నాయి. కేంద్ర ప్రభుత్వం ప్రకటించిన డిజిటల్ ఇండియాపై కూడా విమర్శలు గుప్పించారు. డిజిటల్ ఇండియా కావాలంటే టెలికాం సెక్టార్ కూడా ముఖ్యమని అభిప్రాయపడ్డారు. కాబట్టి ముందుగా మౌలిక సదుపాయాలు మెరుగుపరిచిన తర్వాతనే డిజిటల్ ఇండియా బాట పట్టాలన్నారు. టెలికం సంస్థల మధ్య నెలకొన్న పోటీ కారణంగా టారిఫ్‌లు తగ్గిపోయాయని, దీంతో ఆయా సంస్థల ఆర్థిక స్థితిగతులపై ప్రభావం చూపుతోందన్నారు.