తీవ్ర ఆర్థిక సంక్షోభంలో కూరుకుపోయి జెట్ ఎయిర్‌వేస్ బుధవారం రాత్రి నుంచి తమ సర్వీసులను తాత్కాలికంగా నిలిపివేస్తున్నట్లు ప్రకటించింది. ఇప్పటికే ఆ సంస్థ షేర్లు రోజు రోజుకు తగ్గాయి. తాజాగా, ఎయిర్వేస్‌ను క్లోజ్ చేయడంతో జెట్ షేర్లు చాలా నష్టపోయాయి. ఏకంగా 32 శాతం పడిపోయాయి.

స్టాక్‌ ఎక్స్ఛేంజీల్లో జెట్ షేర్లు కుప్పకూలాయి. గురువారం నాటి ట్రేడింగ్‌లో ఆ సంస్థ షేర్లు 32 శాతం నష్టపోయి 52 వారాల కనిష్ఠానికి పడిపోయాయి. బాంబే స్టాక్‌ ఎక్స్ఛేంజీలో ఉదయం భారీ నష్టాలతో ప్రారంభమైంది.

నిధులలేమితో కొట్టుమిట్టాడుతున్న జెట్‌ ఎయిర్వేస్‌కు రూ.400 కోట్ల మేర అత్యవసర నిధులు అందించేందుకు బ్యాంకులు నిరాకరించాయి. దీంతో జెట్ తన ప్రయాణాన్ని తాత్కాలికంగా నిలిపివేసింది. బుధవారం రాత్రి అమృత్‌సర్‌ నుంచి ఢిల్లీకి నడుపుతున్న విమానమే ఆఖరిదని సంస్థ ప్రకటించింది. మరోవైపు జెట్‌ను కొనుగోలు చేసేందుకు ఎవరో ఒకరు ముందుకు వస్తారని రుణదాతలు నేడు విశ్వాసం వ్యక్తం చేశారు.

ఇదిలా ఉండగా, కొనుగోళ్ల కారణంగా ఇటీవల బాగా పెరిగిన బంగారం ధర క్రమంగా తగ్గుతూ వస్తోంది. గురువారం ఒక్కరోజే రూ.405 తగ్గింది. దీంతో 10గ్రాముల బంగారం ధర రూ.32,385కు పడిపోయింది. అంతర్జాతీయంగా సానుకూల సంకేతాలు ఉన్నప్పటికీ, దేశీయంగా డిమాండ్‌ తగ్గడంతో బంగారం ధర దిగొచ్చిందని చెబుతున్నారు. బంగారంతో పాటు వెండి ధర కూడా తగ్గింది. పారిశ్రామిక వర్గాలు, నాణేల తయారీదారుల నుంచి కొనుగోళ్లు లేకపోవడంతో కేజీ వెండి ధర రూ.104 తగ్గి రూ. 38,246గా ఉంది.