హెచ్‌డీఎఫ్‌సీ బ్యాంక్ కస్టమర్లకు శుభవార్త. ఈ బ్యాంకు నుంచి లోన్ తీసుకునే వారికి వడ్డీ రేటు కొంత తగ్గనుంది. ఈ వడ్డీ రేట్ల తగ్గింపు 5 నుంచి 10 బేస్‌ పాయింట్ల మధ్య ఉండనుంది. ఏప్రిల్ 8వ తేదీ నుంచే ఈ రేట్లు అమలులోకి వస్తున్నాయి. ఇప్పటి వరకు ఎంసీఎల్‌ఆర్‌ (మార్జినల్ కాస్ట్ బేస్డ్ లెండింగ్ రేట్స్) రేటు 8.35 ఉండేది. తాజా నిర్ణయంతో అది 8.30కు చేరింది.

నాలుగు రోజుల క్రితం రిజర్వ్ బ్యాంక్ ఆఫ్ ఇండియా (ఆర్బీఐ) రెపో రేటును తగ్గించిన విషయం తెలిసిందే. ఈ నేపథ్యంలో హెచ్‌డీ‌ఎఫ్‌సీ వడ్డీ రేట్లను ఆ మేరకు కాస్త తగ్గించంది. ఈ ఏడాది ఫిబ్రవరి నెల నుంచి ఆర్బీఐ రెండుసార్లు రెపో రేటును తగ్గించింది. ఫిబ్రవరిలో పావు శాతం, ఇటీవల నాలుగు రోజుల క్రితం మరో పావు శాతం తగ్గించింది. దీంతో మొత్తంగా 6.50గా ఉన్న రెపో రేటు 6 శాతానికి తగ్గింది. అంతేకాదు, పాలసీ విధాన మార్పుల ఫలాలను ప్రజలకు చేరువ చేయాలని ఆర్బీఐ ఆదేశించింది.

ఈ నేపథ్యంలో హెచ్‍‌డీఎఫ్‌సీ తాజా నిర్ణయం తీసుకుంది. ఈ నిర్ణయంతో ఒక నెల వడ్డీ రేటు 8.40 నుంచి 8.30కు, మూడు నెలల రేటు 8.45 నుంచి 8.40కు, ఆరు నెలల రేటు 8.55 నుంచి 8.50కు, ఏడాదికి 8.75 నుంచి 8.70కు, రెండేళ్లకు 8.85 నుంచి 8.80కు, మూడేళ్లకు 9 శాతం నుంచి 8.95గా ఉంటుంది. హెచ్‌డీఎఫ్‌సీ ఎంసీఎల్ఆర్‌ను మార్చి 7వ తేదీన చివరిసారి సమీక్షించింది.