ఎంతో ఆర్భాటంగా ప్రారంభమైన నానో కారు చతికిల పడిన విషయం తెలిసిందే. సామాన్యులకు కూడా కారును అందుబాటులోకి తెచ్చేందుకు రతన్ టాటా నానో కారును తీసుకువచ్చారు. ఎంత ఆర్భాటంగా ప్రారంభమైందో అంతే వేగంగా దీని ప్రాభవం తగ్గింది. తాజాగా, 2019లో గత మూడు నెలల్లో టాటా మోటార్స్ ఒక్క నానో కారును కూడా తయారు చేయలేదు. ఫిబ్రవరిలో కేవలం ఒక యూనిట్‌ను మాత్రమే అమ్మారు. మార్చి నెలలో ఒక్క యూనిట్ కూడా అమ్మలేదు.

రెగ్యులేటరీ ఫైలింగ్ ప్రకారం.. గత నెలలో (మార్చి) తాము ఒక్క యూనిట్ కారును కూడా అమ్మలేదని టాటా మోటార్స్ తెలిపింది. ఫిబ్రవరిలో ఒక్క యూనిట్‌ను మాత్రమే విక్రయించింది. 2018 మార్చి నెలలో మొత్తం 31 యూనిట్లు ఉత్పత్తి చేసి 29 కార్లను అమ్మింది. అయితే నానో కారు తయరీ విషయంలో టాటా మోటార్స్ ఇంకా ఏ నిర్ణయం తీసుకోలేదు.

పైగా ప్రస్తుత పరిస్థితుల్లో నానో కారు ప్రస్తుత కర్బన ఉద్గార నిబంధనలకు అనుగుణంగా లేదు. దీంతో వీటిని చేరుకోవాలంటే మరిన్ని పెట్టుబడులు అవసరం. ఇప్పటి దాకా నానో కారును ప్రొడక్షన్‌ నుంచి తప్పించే అంశంపై ఎలాంటి నిర్ణయం తీసుకోలేదని ఓప్రతినిధి తెలిపారు. అయితే వచ్చే ఏడాది (2020) ఏప్రిల్ నుంచి నానో ఉత్పత్తి నిలిపివేయవచ్చునని చెబుతున్నారు.