విజయా, దేనా బ్యాంకులకు బీవోబీ షేర్లు ఎన్ని వస్తాయంటే?

విజయా బ్యాంక్, దేనా బ్యాంకు శాఖలన్నీ కూడా ఏప్రిల్ 1వతేదీ నుంచి బీవోబీ శాఖలుగా పని చేయనున్నాయని, ఈ బ్యాంకుల ఖాతాదారులను కూడా బీవోబీ ఖాతాదారులుగా పరిణించడం జరుగుతుందని ఆర్బీఐ ఓ ప్రకటనలో తెలిపింది. విలీన ప్రతిపాదన ప్రకారం విజయా బ్యాంక్ షేర్ హోల్డర్ల దగ్గర ఉన్న ప్రతి 1,000 షేర్లకుగాను బీవోబీ షేర్లు 402 లభిస్తాయి. దేనా బ్యాంక్ షేర్ హోల్డర్ల దగ్గరున్న ప్రతి 1,000 షేర్లకు గాను బీవోబీ షేర్లు 110 లభిస్తాయి. ఈ మూడింటి విలీనంతో దేశీయంగా ప్రభుత్వంరంగ స్టేట్ బ్యాంక్ ఆఫ్ ఇండియా, ప్రయివేటు రంగంలోని ఐసీఐసీఐ బ్యాంకు తర్వాత మూడో అతిపెద్ద బ్యాంకుగా బీవోబీ ఏర్పడింది.

బ్యాంకింగ్ సంస్కరణలు

ప్రభుత్వం గత సెప్టెంబర్‌లో ఈ బ్యాంకుల విలీనం అంశాన్ని వెల్లడించింది. మూడు బ్యాంకుల సంయుక్త వ్యాపారం విలువ రూ.14.82 లక్షల కోట్లుగా నిర్ణయించారు. నికర మొండి బాకీల నిష్పత్తి 5.71 శాతంగా ఉంటుంది. ఈ విలీనంతో ప్రభుత్వ రంగ బ్యాంకుల సంఖ్య 21 నుంచి 19కి తగ్గుతుంది. బ్యాంకింగ్‌ సంస్కరణల్లో భాగంగా ఇప్పటికే ఐడీబీఐ బ్యాంకులో 51 శాతం వాటాను ఎల్‌ఐసీ కొనుగోలు చేసింది. దీంతోపాటు ఇప్పటికే పీఎస్‌బీల్లో ప్రభుత్వం రూ.1.06లక్షల కోట్ల మేరకు మూలధనాన్ని సమకూర్చింది.

ఎక్కువ బ్యాంకులు కలిగిన రెండో బ్యాంక్ బీవోబీ

బీవోబీలో దేనా, విజయా బ్యాంకులు విలీనం అవడంతో దేశంలో ఎక్కువ బ్యాంకులు ఉన్న బ్యాంకుగా బీవోబీ రెండో స్థానంలో ఉంటుంది. ఇప్పుడు ఈ బ్యాంకుల సంఖ్య దేశంలో 9,500కు చేరుకుంటుంది. అయితే, పలు కారణాల వల్ల కొన్ని శాఖలను క్లోజ్ చేసే అవకాశాలు లేకపోలేదని అంటున్నారు. విలీనమైన బ్యాంకులతో కలుపుకుంటే బీవోబీ అడ్వాన్సెస్ అండ్ డిపాజిట్ మార్కెట్ షేర్లు వరుసగా 6.9 శాతంగా, 7.4 శాతంగా ఉంటుంది.