గత చరిత్ర చూసి మోసపోవద్దు

మ్యూచువల్ ఫండ్స్‌లో పెట్టుబడి పెట్టే ముందు ప్రధానంగా గమనించాల్సిన అంశం ఇదే. గతే ఏడాది ఒక ఫండ్ 30 శాతం లాభాలను అందించిందని అనుకుందాం. ఈ ఏడాది కూడా అదే స్థాయిలో అంత రాబడిన ఆశించడం మాత్రం సరైంది కాదు. ఎవరైనా పాత పర్ఫార్మెన్స్‌ను చూపించి పెట్టుబడి పెట్టమంటే మాత్రం నమ్మొద్దు. మీరు ప్రధానంగా చూడాల్సింది సదరు మ్యూచువల్ ఫండ్ స్కీం ఏంటి, ఫండ్ మేనేజర్ లక్ష్యమేంటి, అసెట్ మేనేజ్‌మెంట్ కంపెనీ గత చరిత్ర వంటివి పరిగణలోకి తీసుకోవాల్సి ఉంటుంది. ఇక థిమాటిక్ ఫండ్స్ ఎంపిక చేసుకునేముందు ఎక్కువ కాలాన్ని పెట్టుబడికి ఎంచుకోవాల్సి ఉంటుంది. కనీసం 5 ఏళ్ల సమయాన్నైనా ఎంచుకోవాలి.

ఎక్కువ మ్యూచువల్ ఫండ్స్ వద్దు

మీరు మ్యూచువల్ ఫండ్స్‌ను ఎంపిక చేసుకోవడం నిజంగా మంచి నిర్ణయం. భవిష్యత్‌లో పెట్టుబడి లక్ష్యాన్ని చేరుకోవడానికి ఇది మంచి సాధనం. అయితే 10-20 మ్యూచువల్ ఫండ్స్ ఎంపిక చేసుకోవడం మాత్రం సరైంది కాదు. వాస్తవానికి ఈక్విటీ మ్యూచువల్ ఫండ్స్ అన్నీ స్టాక్స్‌లోనే పెట్టుబడి పెడ్తాయి. మీరు ఇన్ని మ్యూచువల్ ఫండ్స్‌లో ఇన్వెస్ట్ చేస్తే దాదాపు కొన్ని స్టాక్స్‌కై మీ ఇన్వెస్ట్‌మెంట్‌ను మళ్లించినట్టు అవుతుంది. బెంచ్‌మార్క్ ఇండెక్స్‌ కంటే పెద్ద గొప్ప రాబడి ఏమీ రాకపోవచ్చు. అందుకే ఒకరి పోర్ట్‌ఫోలియోను 6 ఫండ్స్‌కు మించి పెట్టుబడి పెట్టొద్దు. ఈ ఆరు ఫండ్స్‌లో ఈక్విటీ, డెట్, ఈక్విటీ లింక్డ్ సేవింగ్స్ స్కీమ్స్ అన్నీ కలిపే అని గుర్తుంచుకోండి.

పెన్నీ స్టాక్స్‌ కోసం పరుగులొద్దు

పెన్నీ స్టాక్స్‌ అంటే మనలో చాలా మందికి మహా ఇష్టం. ఒక స్టాక్ రూ.20-30 లోపు ఉంటే ఎగబడి కొనేందుకు చాలా మంది సంసిద్ధంగా ఉంటారు. స్టాక్ మార్కెట్‌పై కొద్దో గొప్పో అవగాహన ఉన్న వాళ్లు ఖచ్చితంగా వీటి గురించి వింటారు, డబ్బులు పెడ్తారు, పోగొట్టుకుంటారు. ఇందులో ఎలాంటి సందేహము లేదు. అందుకే కాఫీ టేబుళ్ల దగ్గరో, లంచ్ సమయాల్లోనో వచ్చే స్టాక్ టిప్స్‌ను ఎలాంటి పరిస్థితుల్లోనూ నమ్మొద్దు. స్టాక్స్‌లో పెట్టుబడి పెట్టేముందు మనం చూడాల్సింది వాటి ఫండమెంటల్స్. సంస్థ గ్రోత్ ప్రాస్పెక్ట్స్ ఎలా ఉన్నాయి, డెట్ - ఈక్విటీ రేషియో, డివిడెండ్, మేనేజ్‌మెంట్ క్వాలిటీ వంటివి చూడాల్సి ఉంటుంది. అందుకే స్టాక్స్‌లో పెట్టుబడికి ముందు రీసెర్చ్ చేయండి.

తగ్గినప్పుడు కొందాం

ఇన్వెస్టర్లలో అధిక శాతం చేసే తప్పు ఇదే. తగ్గినప్పుడు కొందాం అని వేచి చూసే ధోరణే మనలో చాలా మంది చేసే అతి పెద్ద తప్పు. ఇన్వెస్ట్‌మెంట్ అనేది ఓ లాంగ్ టర్మ్ కమిట్‌మెంట్. ముఖ్యంగా ఈక్విటీ మార్కెట్లలో పెట్టుబడిని మనం బెస్ట్ టైంను చూడలేం. అది ఎవ్వరి వల్లా సాధ్యమయ్యే పనైతే కాదు. ఎందుకంటే ఇది సైకిల్స్‌లో ముందుకు సాగుతూ ఉంటుంది. మన లక్ష్యమేంటి, అందుకు తగ్గట్లు ఎలాంటి ప్రణాళికను చేసుకుంటున్నాం అని చూసుకోవాలి కానీ మార్కెట్ పడినప్పుడు కొందాం, పెరిగినప్పుడు అమ్ముదాం అంటే మాత్రం సాధ్యమయ్యే పనికాదు. ఫైనాన్షియల్ ప్లానింగ్‌లో భాగంగా ఈ నాలుగు అంశాలనూ గుర్తుపెట్టుకుంటే ఖచ్చితంగా ప్రయోజనం ఉంటుంది.