2018-19 ఆర్థిక సంవత్సరం ముగుస్తున్న నేపథ్యంలో ముగింపు రోజైన మార్చి 31వ తేదీ ఆదివారం వస్తోంది. ఫైనాన్షియల్ ఇయర్ లాస్ట్ డేట్ కాబట్టిఆ రోజు ప్రభుత్వ కార్యకలాపాలు నిర్వహించే శాఖలు తెరిచి ఉంచాలని ఆర్బీఐ ఆదేశాలు జారీ చేసింది. ప్రభుత్వ రసీదులు, చెల్లింపుల కార్యాలయాలు మార్చి 31వ తేదీన పని చేయాలని కేంద్ర ప్రభుత్వం ఇప్పటికే సూచించింది.

ఈ నేపథ్యంలో ప్రభుత్వ కార్యకలాపాలు నిర్వహించే ఏజెన్సీ బ్యాంకుల శాఖలు కూడా పని చేయాలని రిజర్వ్ బ్యాంక్ ఆఫ్ ఇండియా ఆదేశించింది. ఈ ఆర్థిక సంవత్సరానికి గాను ఏజెన్సీ బ్యాంకులు నిర్వహించే ప్రభుత్వ లావాదేవీలు అన్ని కూడా ఈ ఆర్థిక సంవత్సర ఖాతాల్లో ప్రతిబింబించేలా చూడాలని తెలిపింది.

ఇందుకు ఏజెన్సీ బ్యాంకుల శాఖల్లోని కౌంటర్లు ఈ నెల 30వ తేదీ రాత్రి ఎనిమిది గంటల వరకు, 31వ తేదీ సాయంత్రం ఆరు గంటల వరకు తెరిచి ఉంచాలని ఆదేశాల్లో పేర్కొంది. ఆర్టీజీఎస్, నెప్ట్‌లు కూడా ఈ తేదీల్లో పనిచేయనున్నాయి.