సెక్సువల్ హరాస్‌మెంట్.. లైంగిక హింస.. ఈ రోజుల్లో ఏ సంస్థ కూడా దీన్ని ఉపేక్షించడం లేదు. ఈ మాట విన్నా సరే ఉలిక్కిపడ్తున్నాయి. దేశీయంగానే కాకుండా అంతర్జాతీయంగా కూడా నిబంధనలు మరింత కట్టుదిట్టమవుతున్నాయి. ఇక గూగుల్ లాంటి ఎంఎన్‌సీల్లో ఇది ఏ స్థాయిలో ఉంటుందో ప్రత్యేకించి చెప్పాల్సిన పనిలేదు.

ఇక్కడ ఓ సంఘటనలో గూగుల్.. తన మాజీ ఉద్యోగి అమిత్ సింఘల్‌కు 35 మిలియన్ డాలర్లు (సుమారు రూ. 245 కోట్లు) ఇచ్చి మరీ అతడిని సాగనంపింది. ఈ విషయం కోర్ట్ డాక్యుమెంట్ల ద్వారా బయటకు వచ్చింది. తమ అంతర్గత విచారణలో అమిత్ సింఘల్ లైంగిక హింసకు పాల్పడినట్టు సంస్థ గుర్తించింది.

ఓ షేర్ హోల్డర్ గూగుల్ పై లా సూట్ దాఖలు చేసిన నేపధ్యంలో ఈ విషయం వెలుగులోకి వచ్చింది. తమ టాప్ ఎగ్జిక్యూటివ్ చేసిన ఈ పని సంస్థపై ఆర్థికంగా ఎలాంటి ప్రభావాన్ని చూపించిందో బయటకు పొక్కింది. రెండు దఫాల్లో 15 మిలియన్ డాలర్ల చొప్పున నగదుకు తోడు మరో 5 మిలియన్ డాలర్లు సెపరేషన్ అగ్రిమెంట్ కింద ఇచ్చారు. 2016లో సింఘల్‌.. గూగుల్ నుంచి వైదొలిగారు. ఆ సమయంలో ఈ భారీ ప్యాకేజీ ఇచ్చి గూగుల్ చేతులు దులుపుకుంది.

ఆ ఘటన తర్వాత తమ పాలసీల్లో అనేక మార్పులు చేసినట్టు గూగుల్ వెల్లడించింది.