ప్రముఖ శైవ క్షేత్రమైన కేదార్‌నాధ్ గుడిలోని కమిటీలో ముకేష్ అంబానీ కొడుకు అనంత్ అంబానీని సభ్యుడిగా నియమిస్తూ ఉత్తరాఖండ్ ముఖ్యమంత్రి త్రివేంద్ర రావత్ నిర్ణయం తీసుకున్నారు. తరచూ ఈ గుడిని సందర్శిస్తూ.. ఆలయ బాగోగులపై ప్రత్యేక శ్రద్ధ తీసుకుంటున్న నేపధ్యంలో రావత్ ఈ నిర్ణయం తీసుకున్నారు. దీనిపై అంబానీ కుటుంబ సభ్యులతో సంతోషం వ్యక్తం చేశారు.

ఈ ప్రముఖ శైవక్షేత్రాన్ని సందర్శించిన ప్రతీసారీ తమ కుటుంబంలో ఏదో ఒక మంచి జరుగుతుందని ముకేష్ అంబానీ సభ్యులు భావిస్తూ ఉంటారు. అందుకే ఎవరో ఒకరు ఎప్పుడూ ఈ దేవాలయాన్ని వచ్చి ఆ పరమ శివుడి ఆశీస్సులూ పొందుతూ ఉండడం పరిపాటి.

ఇషా అంబానీ పెళ్లి నేపధ్యంలో గతేడాది కేదార్‌నాధ్ సందర్శించిన అంబానీ కుటుంబం అక్కడి పండితుల ఆశీస్సులు పొందారు.

ఉత్తరాఖండ్‌లోని మందాకినీ నది మధ్య హిమాలయ పర్వత శ్రేణుల్లో ఈ కేదార్‌నాధ్ గుడి కొలువై ఉంది. అయితే ఎప్పుడు ఇక్కడ వాతావరణ పరిస్థితులు మారుతాయో చెప్పడం కష్టం. అందుకే ఈ గుడి సందర్శన చాలా కష్టసాధ్యమైంది. ఏప్రిల్ నుంచి నవంబర్ మధ్య మాత్రమే భక్తులకు ఈ ఆలయ సందర్శన భాగ్యం ఉంటుంది. మిగిలిన సమయాల్లో మంచు కారణంగా ఈ ఆలయ దరిదాపుల్లోకి వెళ్లడం కూడా కష్టంగా ఉంటుంది.