ఢిల్లీ : పార్లమెంటులో ప్రవేశపెట్టబోయే కేంద్ర బడ్జెట్.. రైతులకు అనుకూలంగా ఉంటుందన్నారు వ్యవసాయ శాఖ మంత్రి రాధామోహన్ సింగ్. ఇదివరకు 5 బడ్జెట్లను కూడా రైతులకు అంకితం ఇచ్చామన్నారు. అన్నదాతలకు సాధికారత కల్పించడమే లక్ష్యంగా ఈ 6వ బడ్జెట్ లో కూడా వారికే ప్రాధాన్యం ఇచ్చామని తెలిపారు. బడ్జెట్ సమావేశాల్లో పాల్గొనడానికి పార్లమెంటుకు వచ్చిన ఆయన మీడియాతో మాట్లాడారు.

కేంద్ర బడ్జెట్ ఆశాజనకంగానే ఉంటుందన్నారు రైల్వే శాఖ సహాయ మంత్రి రాజెన్ గొహెన్. కేంద్రంలో అధికారంలో ఉన్న తమ ప్రభుత్వం రైల్వేలపై పెట్టుబడులను పెంచిందన్నారు. ప్రయాణీకులకు సౌకర్యవంతమైన ప్రయాణ అనుభూతి కలిగించేలా సాంకేతికతను జోడిస్తున్నామని తెలిపారు. రైల్వే స్టేషన్లలో వైఫై సౌకర్యం, సీసీ టీవీల ఏర్పాటు తదితర సౌకర్యాలు మెరుగుపరిచేలా కృషి చేస్తున్నామన్నారు. రైల్వేలపై పెట్టుబడులు మరింత పెంచే అవకాశమున్నట్లు చెప్పారు.