స్వలింగ సంపర్కడి (గే)ని అయినందుకు తనకెంతో గర్వంగా ఉందన్నారు ఐటీ దిగ్గజం, ఆపిల్‌ సీఈవో టిమ్‌ కుక్‌. తాను 'గే' ఉండటం దేవుడిచ్చిన వరంగా భావిస్తున్నానని టిమ్‌ కుక్‌ తెలపారు. ఇటీవల ఇంటర్వ్యూలో ఆపిల్ సీఈవో చేసిన వ్యాఖ్యలు సోషల్ మీడియాలో వైరల్ అవుతున్నాయి. 2014 అక్టోబర్ 30న దిగ్గజ కంపెనీ సీఈవో టిమ్ కుక్ తాను గే అని బహిర్గతం చేశారు.

ఆయనపై గతంలోనూ ఎన్నో వదంతులున్నా పబ్లిక్‌గా దీనిపై కుక్ స్పందించలేదు. తాను గే అని పేర్కొన్న ఆయన.. అందుకు తనకు చాలా సంతోషంగా ఉందన్నారు. 'గే అయినందుకు గర్వపడుతున్నాను. నేను గే అని తెలిశాక నాకు అదే గౌరవం దక్కింది. ఈ విషయం తెలిసినప్పటి నుంచి చిన్నారులు తమ ఆవేదనను నాతో పంచుకుంటున్నారు. తమ బాధను వ్యక్తం చూస్తూ లేఖలు రాస్తున్నారు. స్వార్థపరుడిగా ఆలోచించి నేను గే అనేది చెప్పకపోతే ఎంతో మంది ఇంకా నరకం అనుభవించేవారు.

ఆత్మహత్య చేసుకోవాలన్న ఆలోచన నుంచి ఎంతో మంది చిన్నారులు బయటపడ్డారు. మైనార్టీ వర్గంగా ఉన్న వ్యక్తులు (గే, లెస్బియన్, ట్రాన్స్‌జెండర్) ఉన్నత స్థానాలు అదిరోహించవచ్చు. స్వలింగ సంపర్కులు తమ కఠోరశ్రమతో ఏదైనా సాధించలరని విశ్వసించాలి. గే చిన్నారులకు తాను అండగా నిలుస్తానని, వారిలో మనోస్థైర్యం నింపేందుకు యత్నిస్తానని' టిమ్ కుక్ పేర్కొన్నారు.

వలస విధానం, పన్నుల విషయంలో అమెరికా అధ్యక్షుడు డోనాల్డ్ ట్రంప్ నిర్ణయాలకు ఆయన మద్దతు తెలిపారు. కార్పోరేట్ పన్ను కోతలపై ట్రంప్ తీసుకున్న నిర్ణయం లాభాన్ని చేకూర్చిందన్నారు. అమెరికాకు మరిన్ని పెట్టుబడులు వస్తాయని టిమ్ కుక్ ధీమా వ్యక్తం చేశారు.