వచ్చే రెండేళ్లలో దేశంలోని ఎస్‌బీఐ ఏటీఎంల రూపురేఖలు మారిపోనున్నాయి. సోలార్ పవర్‌తో పనిచేసే 10,000 ఏటీఎంలను ఏర్పాటు చేసేందుకు ఎస్‌బీఐ ప్రణాళికలు రూపొందిస్తోంది. 2030 నాటికి కార్బన్ రహితంగా మారే దిశలో ఈ అడుగులు వేస్తోంది.

ప్రస్తుతం బ్యాంకు 150 భవనాలపై సోలార్ ప్యానెల్స్‌ని ఉపయోగిస్తోంది ఎస్‌బీఐ. భవిష్యత్తులో పునరుత్పాదక శక్తిని ఎక్కువగా వాడుకోవాలని భావిస్తోంది. ఏడాదిలో 250 భవనాలు సోలార్ ఎనర్జీని ఉపయోగించాలని లక్ష్యంగా పెట్టుకుంది. ఈ ఏడాది ప్రారంభంలో 6.23 మెగావాట్ల సామర్థ్యం గల 151 సోలార్ రూఫ్‌టాప్ ప్యానెళ్లను ఏర్పాటు చేసింది.

ఇక ఎస్‌బీఐ రెండో గ్రీన్ మారథాన్‌ను ప్రకటించింది. ఈ మారథాన్ భారతదేశంలోని 15 నగరాల్లో జరగనుంది. 75,000 మంది పాల్గొంటారని అంచనా.

ప్రస్తుతం 1,200 ఏటీఎంలు సోలార్ పవర్‌తో పనిచేస్తున్నాయి. ఆ సంఖ్యను రెండేళ్లలో 10,000 ఏటీఎంలకు చేర్చాలన్నది మా లక్ష్యం. అంతేకాదు మేం ఎలక్ట్రిక్ వెహికిల్స్‌నే ఉపయోగించబోతున్నాం. 2030 నాటికి మా బ్యాంకులు కేవలం ఎలక్ట్రిక్ వాహనాలను మాత్రమే ఉపయోగిస్తాయి అని ప్రశాంత్ కుమార్, ఎస్‌బీఐ డిప్యూటీ మేనేజింగ్ డైరెక్టర్ తెలిపారు.