భారత టెలీకాం రంగంలో రిలయన్స్ జియో నుంచి వస్తోన్న పోటీని తట్టుకోవడానికి ఎయిర్‌టెల్ రోజుకో కొత్త ప్రీపెయిడ్ ప్లాన్‌ను తీసుకొస్తోంది. కస్టమర్లు చేజారిపోకుండా కాపాడుకోవడానికి, కొత్త వినియోగదారులను ఆకర్షించడానికి తక్కువ ధరకే ఎక్కువ డాటాను అందించే ఆకర్షణీయ ప్లాన్లను ప్రవేశపెడుతోంది. దీనిలో భాగంగా శుక్రవారం రూ.168 విలువ గల ప్రీపెయిడ్ ప్లాన్‌ను తీసుకొచ్చింది. ఈ ప్లాన్ కింద అపరిమిత కాలింగ్, రోజుకి 1జీబీ డాటా, 100 ఎస్ఎంఎస్‌లను ఎయిర్‌టెల్ అందజేస్తుంది. ఈ ప్లాన్ కాల పరిమితి 28 రోజులు. అంటే మొత్తం మీద 28జీబీ డాటాను ఈ ప్లాన్ కింద ఎయిర్‌టెల్ అందిస్తుంది.

ఈ ప్లాన్ కింద కేవలం కాలింగ్, డాటా, ఎస్ఎంఎస్‌లే కాకుండా ఉచితంగా హెలో ట్యూన్స్‌ను సబ్‌స్ర్కైబ్ చేసుకునే వెసులుబాటును కల్పిస్తోంది. ఇప్పటికే జియో హెలో ట్యూన్స్‌ను ఉచితంగా అందిస్తోంది. ఇప్పుడు ఈ బాటలోకి ఎయిర్‌టెల్ కూడా చేరింది. ఈ కొత్త ప్లాన్ అన్ని టెలీకాం సర్కిళ్లలో అందుబాటులోకి వచ్చిందని కంపెనీ ఓ ప్రకటనలో వెల్లడించింది.

ఇదిలా ఉంటే, ఇటీవలే వొడాఫోన్ కూడా రూ.159 ప్రీపెయిడ్ ప్లాన్‌ను తీసుకొచ్చింది. ఎయిర్‌టెల్ ఇస్తున్నట్టే ఈ ప్లాన్ కింద వొడాఫోన్ 28జీబీ డాటా, అపరిమిత కాలింగ్, రోజుకి 100 ఎస్ఎంఎస్‌లు అందిస్తోంది. మరోవైపు ఈ వారం ప్రారంభంలో జియోకు పోటీగా ఎయిర్‌టెల్ రూ.419 ప్లాన్‌ను ప్రకటించింది. ఈ ప్లాన్ కింద 75 రోజుల కాలపరిమితితో రోజుకి 1.4జీబీ డాటా, 100 ఎస్ఎంఎస్‌లు, అపరిమిత కాలింగ్ అందిస్తోంది. అపరిమిత కాలింగ్‌కు ఎలాంటి రోజువారీ పరిమితిని పెట్టలేదు. రూ.168 ప్లాన్‌లో రోజుకి గరిష్టంగా 250 నిమిషాలు మాత్రమే మాట్లాడటానికి వీలుంటుంది. కానీ రూ.419 ప్లాన్‌లో అలాంటి పరిమితి ఏమీ లేదు.