ఊబెర్ ఫ్లయింగ్ క్యాబ్

అవును ఇది అక్షరాలా నిజం. ఎక్కడికైనా త్వరగా వెళ్లాలంటే ఊబెర్ క్యాబ్ బుక్ చేయడం మీకు అలవాటా? ఇంకా త్వరగా వెళ్లాలంటే మాత్రం ఊబెర్ ఫ్లయింగ్ క్యాబ్ బుక్ చేసుకోవచ్చు. దర్జాగా మినీ ఫ్లైట్‌లో కూర్చొని సీట్ బెల్ట్ పెట్టుకొని రయ్యిమంటూ ఆకాశంలో వెళ్లొచ్చు.

లాంఛ్

మీ గమ్యానికి ఇంకా త్వరగా చేరుకోవచ్చు. ఇదంతా జరగడానికి ఎన్నో ఏళ్లు పట్టదు. త్వరలో ఇండియాలో ఊబెర్ ఫ్లయింగ్ క్యాబ్ సర్వీసులు ప్రారంభమయ్యేందుకు ముందడుగులు పడుతున్నాయి. వచ్చే ఐదేళ్లలో ఈ కల నెరవేరే అవకాశముంది. ఫ్లయింగ్ క్యాబ్ సర్వీస్ లాంఛ్ చేయడానికి ఊబెర్ కంపెనీ ఐదు దేశాలను ఎంపిక చేసింది.

ఇండియాతో పాటు

అందులో ఇండియాతో పాటు ఆస్ట్రేలియా, బ్రెజిల్, ప్రాన్స్, జపాన్ ఉన్నాయి. టోక్యోలో జరిగిన ఊబెర్ ఎలివేట్ ఆసియా పసిఫిక్ ఎక్స్‌పో లో ఈ ప్రకటన చేసింది కంపెనీ. ఇప్పటికే ఊబెర్ ఎలివేట్ అమెరికాలోని డల్లాస్, లాస్ ఏంజిల్స్‌ని ఎంపిక చేసింది కంపెనీ. ఎంపిక చేసిన ఐదు దేశాల నుంచి ఒక్కో నగరాన్ని సెలెక్ట్ చేస్తుంది ఊబెర్.

క్లిక్ చేస్తే

ఊబెర్ ప్రణాళికలు కార్యరూపం దాలిస్తే మీరు కూర్చున్న చోట ఓ క్లిక్ చేస్తే చాలు ఫ్లైట్ వచ్చి మిమ్మల్ని మీ గమ్యానికి తీసుకెళ్తుంది. ఆసియా పసిఫిక్ నగరాల్లో ఊబెర్ ఎయిర్ రూట్స్ ఎంత సమర్థవంతంగా పనిచేస్తాయో స్థానిక రవాణా వ్యవస్థకు ఎంత ఉపయోగపడ్తాయో వివరించింది కంపెనీ. అంతేకాదు ఊబెర్ ఈట్స్‌ తరఫున డ్రోన్ డెలివరీని ప్రయోగాత్మకంగా లాంఛ్ చేయాలని కంపెనీ భావిస్తోంది.

బెంగళూరు

ఊబెర్ ఎలివేట్ ఆసియా పసిఫిక్ ఎక్స్‌పో తొలిసారి నిర్వహిస్తున్నందుకు గర్వంగా ఉంది. ఊబెర్ ఎయిర్ కోసం ఐదు దేశాలను ఎంపికచేశాం. మా టెక్నాలజీతో కొత్త శిఖరాలను తాకుతున్నాం. ముంబై, ఢిల్లీ, బెంగళూరు ప్రపంచంలోనే రద్దీగా ఉండే నగరాలు. కొన్ని కిలోమీటర్లు ప్రయాణించాలంటేనే గంటల సమయం పడుతుంది. ఎంత రద్దీగా ఉన్నా వేగంగా గమ్యాన్ని చేరేందుకు ఊబెర్ ఎయిర్ ఎంతో ఉపయోగపడుతుంది.