హెచ్1-బి వీసాల విషయంలో ప్రీమియం ప్రాసెసింగ్‌పై సస్పెన్షన్‌ను అమెరికా ప్రభుత్వం మరికొన్నాళ్లు పొడిగించింది. బ్యాక్‌లాగ్‌ల క్లియరింగ్ ప్రయత్నాల్లో భాగంగానే ఇలా చేస్తున్నట్లు తెలిపింది. దీంతో ఆ వీసాల కోసం ఎదురుచూస్తున్న భారతీయులకు మరికొన్నాళ్లు ఇబ్బందులు తప్పేలా లేవు. భారతీయ ఐటీ నిపుణులలో హెచ్1-బి వీసాలకు బాగా డిమాండు ఉంది. రూ. 86 వేల అదనపు ఫీజు కడితే సాధారణంగా ఆరు నెలలు పట్టే వీసా ప్రాసెసింగ్ సమయం 15 రోజులకు తగ్గిపోతుంది. ఫలితంగా వీసా త్వరగా మంజూరయ్యే అవకాశం ఉంటుంది. కానీ ఈతరహా ప్రీమియం ప్రాసెసింగ్‌ను 2019 ఫిబ్రవరి వరకు సస్పెండ్ చేస్తున్నట్లు యూఎస్‌సీఐఎస్ తెలిపింది.

సెప్టెంబరు 11వ తేదీ నుంచి ఈ తాజా సస్పెన్షన్ ప్రారంభమవుతుంది. 2007 నుంచి 2017 మధ్య కాలంలో నిపుణులైన భారతీయ ఐటీ ఇంజనీర్లకు చెందిన 22 లక్షల హెచ్1-బి పిటిషన్లు అందినట్లు యూఎస్‌సీఐఎస్ తెలిపింది. భారత్ తర్వాత అత్యధికంగా చైనా నుంచి 3 లక్షల హెచ్-1బి పిటిషన్లు అదే సమయంలో అందాయి. హెచ్-1బి నాన్ ఇమ్మిగ్రెంటు విభాగంలో వీసా పొందినవారు మూడేళ్లపాటు అమెరికాలో ఉద్యోగం చేసుకోవచ్చు. ఆ తర్వాత మరో మూడేళ్ల పాటు పొడిగిస్తారు