మంగళవారం రికార్డు లాభాల్లో ముగిసిన మార్కెట్లు.. బుధవారం నష్టాలను చవిచూడాల్సి వచ్చింది. క్రితం రోజు సెన్సెక్స్‌ 202 పాయింట్లు లాభపడి 38,897 వద్ద సరికొత్త జీవనకాల గరిష్ఠస్థాయి వద్ద, నిఫ్టీ కూడా 46 పాయింట్ల లాభంతో 11,738 వద్ద ముగిసిన సంగతి తెలిసిందే. అయితే బుధవారం ఉదయం నుంచే సూచీలు ఫ్లాట్‌గా ప్రారంభమయ్యాయి. ట్రేడింగ్ ఆరంభంలో సెన్సెక్స్‌ 11.77 పాయింట్ల నష్టంతో 38884.86 పాయింట్ల వద్ద ప్రారంభమైంది. నిఫ్టీ 10.70 పాయింట్ల నష్టంతో 11727.80 పాయింట్ల వద్ద ట్రేడింగ్‌ ఆరంభించింది. రూపాయి విలువ పతనం కూడా మార్కెట్ సెంటిమెంట్‌ను దెబ్బతీసింది. ముఖ్యంగా బ్యాంకింగ్‌, ఐటీ రంగాల షేర్లలో అమ్మకాల జోరు కొనసాగడంతో సూచీలు నష్టాల బాటలో పయనించాయి.

ట్రేడింగ్ ముగిసే సమయానికి సెన్సెక్స్‌ 173.7 పాయింట్ల నష్టంతో 38,722.93 వద్ద ముగిసింది. మరోవైపు నిఫ్టీ 11700 పాయింట్ల దిగువకు చేరి 46.6 పాయింట్ల నష్టంతో 11,691.90 వద్ద ముగిసింది. డాలర్‌తో రూపాయి మారకం విలువ రూ. 70.46 వద్ద ముగిసింది. బంగారం ధరలో స్వల్ప పెరుగుదల నమోదైంది. ప్రస్తుతం బంగారం ధర 96 (+0.32%) పాయింట్లు లాభపడి 30120.00 వద్ద ట్రేడ్ అవుతోంది. వెండి మాత్రం క్రితం ట్రేడింగ్‌తో పోల్చితే 100 (-0.27%) పాయింట్లు నష్టపోయి 37020.00 వద్ద ట్రేడ్ అవుతోంది.

నేటి ట్రేడింగ్‌లో యూపీఎల్, బజాజ్ ఫినాన్స్, ఎస్‌బీఐ, ఓఎన్‌జీసీ, గెయిల్ టాప్ గెయినర్స్‌గా నిలువగా.. ఐడియా సెల్యూలర్, కోల్ ఇండియా, పవర్‌గ్రిడ్ కార్పొరేషన్, రిలయెన్స్, ఏచెర్ మోటార్స్ టాప్ లూజర్స్‌గా మిగిలాయి.

ఎన్‌ఎస్‌ఈలో.. టాటామోటార్స్, టాటాస్టీల్, ఐవోసీ, ఐసీఐసీఐ బ్యాంకు, హీరో మోటోకార్ప్, విప్రో, ఐటీసీ, కోటక్ మహీంద్రా, ఇన్ఫోసిస్‌, బజాజ్ ఆటో, టీఎస్, హెచ్‌డీఎఫ్‌సీ, సన్‌ఫార్మా షేర్లు లాభాల్లో ముగిశాయి. మరోవైపు లుపిన్, యస్‌బ్యాంక్, ఇండస్‌ఇండ్ బ్యాంకు, ఎన్టీపీసీ, తదితర షేర్లు నష్టాలతో ముగిశాయి.