పంజాబ్ నేషనల్ బ్యాంకు తనను నట్టేట ముంచిందని నీరవ్ మోడీ ఆవేదన వ్యక్తంచేశారు. వడ్డీతో సహా అప్పులు కట్టే శక్తి సామర్థ్యాలు, అవకాశాలు ఉన్నప్పటికీ బ్యాంకు ఉన్నతాధికారుల నిర్వాకరం కారణంగా తన బ్రాండ్, పలుకుబడి, పేరు ప్రఖ్యాతలు అన్నీ గంగలో కలిశాయని అన్నారు. పీఎన్‌బీ ఉన్నతాధికారుల తెలివి తక్కువ తనం, తొందరపాటు ధోరణితో తనకు అన్నిదారులు మూసుకుపోయాయని అన్నారు. పరిస్థితులు చేయి దాటిపోవడంతో విదేశాలకు వెళ్లాల్సి వచ్చిందని అన్నారు.అసలు తనకు రూ.11,400 కోట్ల అప్పే లేదని అన్నారు.

బకాయిలన్నీ కలుపుకున్నా రూ.5 వేల కోట్లు దాటవని అన్నారు. తన సంస్థల బ్రాండ్ ఇమేజ్‌తో పాటు స్థిర, చర ఆస్థుల మార్కెట్ విలువ 6,500 కోట్ల వరకు ఉంటుందని అన్నారు. వీటన్నింటిని అమ్మి అప్పు కడతానని చెప్పినా వినిపించుకోకుండా పీఎన్‌బీ బ్యాంకు తనతో పాటు కుటుంబసభ్యులపై క్రిమినల్ కేసులు పెట్టడం వల్లే దేశం విడిచి వెళ్లాల్సి వచ్చిందని బ్యాంకు మేనేజ్‌మెంట్‌కు రాసిన లేఖలో పేర్కొన్నారు. ఎలాగైన అప్పులు వెంటనే వసూలు చేయాలన్న ఆతృతతో ముంబై బ్రాంచ్‌లో 11400 కోట్ల మోసం జరిగిందని పీఎన్‌బీ ఉన్నతాధికారులు 'స్టాక్ ఎక్జేంజ్'కు చెప్పడంతో పాటు సీబీఐ, ఎన్‌ఫోర్స్‌మెంట్ డైరెక్టరేట్‌కు ఫిర్యాదు చేశారని అన్నారు. తన వ్యాపారాలతో ఏ సంబంధం లేని కుటుంబసభ్యులపై కూడా క్రిమినల్ కేసులు పెట్టారని అన్నారు. అంతటితో ఆగకుండా సీబీఐ, ఈడీతో దేశవ్యాప్తంగా తన కార్యాలయాల్లో సోదాలు నిర్వహించారని అన్నారు. ఈ సోదాలకు మీడియా అమిత ప్రాధాన్యం ఇవ్వడం వల్ల తన పలుకుబడి ఒక్కసారిగా పతనం అయిందని అన్నారు. అటు బ్యాంకు ఇటు మీడియా సంయమనం పాటించకపోవడం వల్ల అన్నిదారులు మూసుకుపోవడంతో దేశం విడిచి పెట్టాల్సి వచ్చిందని అన్నారు.సీబీఐ,ఈడీ సోదాల కంటే కొన్ని రోజుల ముందు ... తన ఆస్థులన్నీఅమ్మి అప్పులు వసూలు చేసుకోవాలని బ్యాంకు ఉన్నతాధికారులకు లేఖలు రాసిన విషయాన్ని కూడా గుర్తు చేశారు. పీఎన్‌బీ దగ్గర తప్ప మరే బ్యాంకు వద్ద తాను అప్పులు తీసుకోలేదని తెలిసి కూడా బ్యాంకు మేనేజ్‌మెంట్ సంయమనం పాటించలేదని వాపోయారు. అన్ని పరిణామాలకు సిద్ధపడే దేశం విడిచి వెళ్లినట్లు చెప్పారు. ప్రస్తుతం తన ఖాతాలో ఉన్న క్యాష్ బ్యాలెన్స్‌తో తన సంస్థలో పనిచేసే 2,200 మంది సిబ్బందికి ఈ నెల జీతాలు చెల్లించాలని విజ్ఞప్తి కూడా చేశారు.