4 కోట్ల‌కు పైగా ఉన్న పీఎఫ్ ఖాతా దారుల‌కు శుభ‌వార్త‌. ఉద్యోగ భవిష్య నిధి సంస్థ ఈపీఎఫ్‌వో తమ ఖాతాదారులకు ఓ సరికొత్త సదుపాయాన్ని తీసుకొచ్చింది. ఇందులో భాగంగా తమ పాత ఖాతాలను కొత్త యూఏఎన్‌లో కలిపేసుకోవచ్చు.

ఒక ఉద్యోగికి-ఒకే ఈపీఎఫ్ ఖాతా అన్న లక్ష్యంలో భాగంగా ఈ సౌకర్యాన్ని అందుబాటులోకి తీసుకొచ్చారు. గరిష్ఠంగా 10 పాత ఖాతాల వరకు ప్రస్తుత యూనివర్సల్ పోర్టబుల్ అకౌంట్ నంబర్ (యూఏఎన్)లో విలీనం చేసుకునే వెసులుబాటును ఈపీఎఫ్‌వో కల్పించడం గమనార్హం. ఉద్యోగంలో భాగంగా సంస్థలు మారడం సర్వసాధారణమే. అలా మారినప్పుడు పాత ఖాతాలు, అందులోని మొత్తాలు అలాగే ఉండిపోతుండగా, ఇప్పుడు కొత్త ఖాతాలోకి మళ్లించుకోవచ్చు. ఇదివ‌ర‌కూ ఉద్యోగి ఒక సంస్థ నుంచి మ‌రో సంస్థ‌కు మారిన‌ప్పుడు ప్ర‌తిసారి ప్ర‌త్యేకంగా క్లెయిం కోసం అభ్య‌ర్థించాల్సి వ‌చ్చేది. పీఎఫ్ నియంత్ర‌ణ‌ సంస్థ డిజిటల్ బాట ప‌ట్టిన త‌ర్వాత కొంత మంది ఆన్‌లైన్ బ‌దిలీ స‌దుపాయం ఉప‌యోగించుకుంటున్నారు.
ఇక‌పై యూఏఎన్ యాక్టివేట్ అయి ఉంటే ఈపీఎఫ్ ఖాతాలో సొమ్మును మొత్తం ఒకే దాని కింద‌కు మార్చుకోవ‌చ్చు.అయితే యూఏఎన్ మెంబ‌ర్ పోర్ట‌ల్‌లో పీఎఫ్ చందాదారులు యూఏన్, మెంబ‌యి ఐడీ, మొబైల్ నంబ‌రు వంటి వివ‌రాలు క‌చ్చితంగా స‌మ‌ర్పించాలి.