డిసెంబ‌రు 2న తెలంగాణ ప్ర‌భుత్వం దివ్యాంగుల‌కు తీపి క‌బురు చెప్పింది. వారి కోసం ప్ర‌త్యేకంగా ఐటీ క్యాంప‌స్ ఏర్పాటు చేయ‌నున్న‌ట్లు ప్ర‌క‌టించింది. ఇలాంటిది నిర్మించ‌డం ప్ర‌పంచంలోనే మొద‌టిసార‌ని తెలంగాణ ప్ర‌భుత్వం స‌గ‌ర్వంగా తెలిపింది. వింధ్యా ఈ-ఇన్ఫోమీడియా ప్రైవేటు లిమిటెడ్ భాగ‌స్వామ్యంతో ఈ మేర‌కు తెలంగాణ ప్ర‌భుత్వం ఒప్పందం కుదుర్చుకుంది. ఈ దివ్యాంగుల ఐటీ పార్క్ విక‌లాంగుల కొర‌కు ప్ర‌త్యేక అవ‌కాశాలు క‌ల్పించే దానిపైన దృష్టి సారిస్తుంది. హైద‌రాబాద్ అంత‌ర్జాతీయ విమాన‌శ్ర‌యం స‌మీపంలో ఐటీ పార్క్ లోప‌లే దీన్ని అభివృద్ది చేస్తార‌ని తెలుస్తోంది.

వింధ్యా ఈ-ఇన్ఫోమీడియా దివ్యాంగ ఉద్యోగుల్లో ప్ర‌తిభ‌ను బయ‌ట‌కు తీసేందుకు, వారికి స‌రైన అవ‌కాశాలు క‌ల్పించేందుకు కృషి చేస్తోంది. ఈ సంస్థ అటువంటి వారు ఉద్యోగాలు చేసుకునేందుకు అనువుగా వ‌స‌తులు క‌ల్పించింది. ఈ సంస్థ‌కు హైద‌రాబాద్, బెంగుళూరులో కార్యక‌లాపాలు ఉన్నాయి. మొత్తం 1600 మంది ఉద్యోగులు ప‌నిచేస్తున్నారు. ఈ కంపెనీలో ఎక్కువ శాతం ఉద్యోగుల‌కు శారీర‌క లోపం, వినికిడి లోపం, చూపు త‌క్కువ ఉండ‌టం వంటి లోపాలు క‌లిగిన వారు ఉంటారు. ఈ కంపెనీ ఎక్కువ‌గా బీఎఫ్ఎస్ఐ, టెలికాం, ఈ-కామ‌ర్స్ సంస్థ‌ల్లో బీపీవో కార్య‌క‌లాపాల సేవ‌ల‌ను అందిస్తున్న‌ది.