మార్కెట్ల‌లో ఒక్క‌సారిగా కుదుపు

స్టాక్‌ మార్కెట్‌లో ఒక్క‌సారిగా ఊపందుకున్న‌ అమ్మకాలతో స్టాక్‌ మార్కెట్లు భారీగా పతనమయ్యాయి. సెన్సెక్స్ 281 పాయింట్ల మేర క్షీణించి 33,033 వద్ద, నిఫ్టీ 96.80 పాయింట్ల నష్టంలో 10,224 వద్ద ముగిశాయి. సెన్సెక్స్ ఈ రోజు 33,417 వ‌ద్ద గ‌రిష్టాన్ని తాక‌గా 33000 వ‌ద్ద క‌నిష్టానికి వెళ్లింది. మిడ్ సెషన్‌ నుంచీ పెరిగిన అమ్మకాలతో ఎన్‌ఎస్‌ఈ,బీఎస్ఈలో దాదాపు అన్ని రంగాలూ నష్టపోయాయి. రెండు వ‌రుస సెష‌న్ల‌లో లాభాల‌కు చెక్ పెడుతూ ఈ రోజు మార్కెట్లు న‌ష్ట‌పోయాయి. అదానీ పోర్ట్స్, కోల్ ఇండియా, ఎల్ అండ్ టీ, ఆర్ఐఎల్ వంటి ప్ర‌ధాన కంపెనీల షేర్లు ప‌డిపోవ‌డ‌మే మార్కెట్లు ఇంత‌గా దిగ‌జార‌డానికి కార‌ణం.
బీఎస్ఈలో రంగాల వారీగా చూస్తే లోహ రంగం(1.84%), క‌న్సూమ‌ర్ డ్యూర‌బుల్స్‌(1.76%), క్యాపిట‌ల్ గూడ్స్(1.55%), స్థిరాస్తి(1.5%) న‌ష్ట‌పోయాయి. మ‌రో వైపు ఐటీ(0.18%) మాత్రం కాస్త లాభ‌ప‌డి ఫ‌ర్వాలేద‌నిపించింది.

సెన్సెక్స్ సూచీలో లాభ‌ప‌డ్డ‌, న‌ష్ట‌పోయిన కంపెనీల వివ‌రాలు ఇలా ఉన్నాయి. టీసీఎస్(2.06%), ఎం అండ్ ఎం(1.27%), స‌న్ ఫార్మా(0.99%), ప‌వ‌ర్ గ్రిడ్(0.24%), కొట‌క్ బ్యాంక్(0.24%) లాభ‌ప‌డిన వాటిలో ముందున్నాయి. మ‌రో వైపు న‌ష్ట‌పోయిన వాటిలో అదానీ పోర్ట్స్(4.11%), ఓఎన్జీసీ(3.41%), కోల్ ఇండియా(3.00%), హెచ్డీఎఫ్‌సీ(2.15%), ఎల్ అండ్ టీ(1.87%) ముందు ఉన్నాయి.