నోట్ల ర‌ద్దు వల్ల దేశానికి ఏం ఒరుగుతోందో తెలియ‌దు కానీ చిన్న వ్యాపారాలు చితికిపోయాయి. అంతే కాకుండా స్వ‌ల్ప‌కాలంలో ఆర్థిక వ్య‌వ‌స్థ‌లో వృద్ది కుంటుప‌డింది. నోట్ల రద్దుతో లక్షల కోట్ల నల్ల ధనం ఖజానాకి చేరుతుందని ప్రభుత్వం చెప్పినా... వాస్తవానికి సర్కారుకే ఖర్చు తడిసి మోపెడయ్యింది. నోట్ల రద్దుతో ప్రభుత్వానికి రూ.16,000 కోట్ల లాభం రాగా, రూ.2 లక్షల కోట్లు నష్టపోవాల్సి వచ్చింది. అదేంటి ప్ర‌భుత్వం నోట్ల మార్పిడి(ర‌ద్దు) కార‌ణంగా వ్య‌వ‌స్థ‌కు ఎంతో ప్ర‌యోజ‌నం క‌లిగింద‌ని చెబుతోంది క‌దా అంటారా... అయితే ఈ క‌థ‌నం చ‌ద‌వండి.

ఆర్‌బీఐ గణాంకాల ప్రకారం రద్దు చేసేనాటికి చెలామణిలో ఉన్న పెద్ద నోట్ల విలువ రూ.15.44 లక్షల కోట్లు. దాన్లో రూ.15.28 లక్షల కోట్లు బ్యాంకు ఖాతాల్లో వ‌చ్చి పోగ‌య్యాయి. దీంతో రూ.16,000 కోట్లు మాత్రమే ప్రభుత్వ ఖజానాకు మిగిలినట్లు లెక్క. కానీ తొలుత ప్రభుత్వం పెద్ద నోట్ల రద్దు చేస్తే 13 నుంచి 14 లక్షల కోట్లు మాత్రమే వెనక్కొస్తాయని, కనీసం రెండు లక్షల కోట్లు మిగులుతాయని అంచనా వేసింది.
వ్యయం రూ. 30,000 కోట్లపైనే..
పాత నోట్లను రద్దు చేసి కొత్త నోట్లను ప్రవేశపెట్టడం ఆర్‌బీఐకి తలకు మించిన భారమయింది. రద్దయిన పాత నోట్లను స్వీకరించి, వాటి స్థానంలో కొత్త నోట్లను ప్రవేశపెట్టడం, రవాణా, కొత్త నోట్లకు అనుగుణంగా ఏటీఎంలను రీ కాలిబ్రేషన్‌ చేయడం కోసం సుమారు రూ.30,000 కోట్లు ఖర్చయినట్లు అధికార వర్గాలు చెప్పాయి. ఆర్‌బీఐ గణాంకాల ప్రకారం ముద్రణా వ్యయం రెట్టింపయి రూ.7,965 కోట్లకు చేరింది. ఖర్చు పెరిగింది కనక ప్రభుత్వానికిచ్చే డివిడెండ్‌లో ఆర్‌బీఐ రూ.35,221 కోట్లు కోతపెట్టింది. ఇవికాక నోట్ల రద్దు, డిజిటల్‌ లావాదేవీలపై ప్రజల్లో అవగాహన కల్పించడానికి కేంద్ర రాష్ట్ర ప్రభుత్వాలు సుమారు రూ.10,000 కోట్లపైనే ఖర్చు చేశాయి.