ఆధార్ క‌లిగి ఉండి ఐఆర్‌సీటీసీ వెబ్‌సైట్లో ఆన్‌లైన్‌లో రైల్వే టికెట్‌ బుక్‌ చేసుకునే ప్రయాణికులకు శుభవార్త. ఇకపై ఈ పోర్టల్‌ నుంచి ఒక నెలలో 12 టికెట్లు పొందే అవకాశాన్ని కల్పిస్తూ కేంద్రం నిర్ణయం తీసుకుంది. ఆధార్‌తో అనుసంధానం చేసుకున్న ప్రయాణికులకు మాత్రమే ఇది వర్తిస్తుందని అధికారులు చెప్పారు. అక్టోబర్‌ 26 నుంచే ఈ సౌకర్యం అందుబాటులోకి వచ్చిందని ప్రకటించారు. ప్ర‌యాణికులు త‌మ ఆధార్ నంబ‌ర్ల‌ను ఐఆర్‌సీటీసీ ఖాతాతో అనుసంధానించేలా భాగంగా రైల్వే శాఖ ఈ విధ‌మైన చ‌ర్య తీసుకున్న‌ట్లు తెలుస్తోంది.

గతంలో ఈ పోర్టల్‌ ద్వారా ఒక నెలలో ఆరు టికెట్లు మాత్రమే ఇచ్చేవారు. ఆరు కంటే ఎక్కువ టికెట్లు కావాల్సిన వారు ఐఆర్‌సీటీసీ మై పోర్టల్‌లోని కేవైసీలో ఆధార్‌ నంబర్‌ వివరాలను అప్‌లోడ్‌ చేసుకోవాలి. దీని కోసం నమోదు చేసుకున్న మొబైల్‌ నంబర్‌కు వన్‌టైం పాస్‌వర్డ్‌ వస్తుంది. అయితే ఆధార్‌ కార్డుతో అనుసంధానం చేయ‌నివారు ఎప్పటిలాగే ఆరు టికెట్లు బుక్‌ చేసుకోవచ్చని చెప్పారు. ఒక టిక్కెట్ బుక్ చేసుకున్న‌ప్పుడు 6 మంది వ‌ర‌కూ జ‌న‌ర‌ల్ కోటాలో, అదే త‌త్కాల్‌లో అయితే 4గురు వ‌ర‌కూ ప్ర‌యాణించేలా ఆన్లైన్ టికెట్ బుకింగ్ కోసం ఐఆర్‌సీటీసీ అనుమ‌తిస్తుంది.