దేశ అతిపెద్ద బ్యాంకు ఎస్‌బీఐ వ‌డ్డీ రేట్ల‌ను త‌గ్గించింది. గృహ రుణాలు, ఆటోమొబైల్ రుణాల‌కు సంబంధించి వినియోగ‌దారులు తీసుకునే రుణాల‌పై వ‌డ్డీ రేట్ల‌ను 0.05% మేర త‌గ్గించిన‌ట్లు స్టేట్ బ్యాంక్ ఆఫ్ ఇండియా ప్ర‌క‌టించింది. ఇప్ప‌టి వ‌ర‌కూ త‌గ్గించిన వ‌డ్డీ రేట్ల ద్వారా చూస్తే గృహ రుణాల‌పై వ‌డ్డీ రేట్ల‌ను 8.30% వ‌ర‌కూ త‌గ్గించిన‌ట్లు దేశంలోనే అగ్రగామి బ్యాంకు పేర్కొంది. అదే విధంగా వాహ‌న రుణాల విష‌యంలో వ‌డ్డీ రేట్ల‌ను ఇంత‌కుముందున్న 8.75% నుంచి 0.05% త‌గ్గించి 8.70%గా నిర్ణ‌యించింది. అర్హ‌త క‌లిగిన ఉద్యోగ‌స్థులంద‌రికీ ఈ కొత్త వ‌డ్డీ రేట్ల‌తో అప్పు ల‌భిస్తుంద‌ని ఎస్బీఐ వెల్ల‌డించింది.

ముఖ్యంగా గృహ రుణాల విష‌యంలో రూ.30 ల‌క్ష‌ల లోపు తీసుకునే వారికి వార్షికంగా 8.30% వ‌డ్డీ రేట్ అమ‌ల‌వుతుంది. వాహ‌నాలు(ఆటోమొబైల్స్) కొనుక్కునే వారు తీసుకునే రుణాల వ‌డ్డీ రేట్లు ఆక‌ర్ష‌ణీయంగా 8.70% నుంచి 9.20% మ‌ధ్య ఉంటాయ‌ని బ్యాంకు తెలిపింది. ఈ త‌ర‌హా రుణ వ‌డ్డీ రేట్లు ఇంత‌కు ముందు 8.75% నుంచి 9.25% మ‌ధ్య ఉన్నాయి. అయితే క‌చ్చితంగా ఏ వినియోగ‌దారుకు ఎంత వ‌డ్డీ రేటు విధిస్తార‌నే విష‌యం ఆ వ్య‌క్తి క్రెడిట్ స్కోర్ ఆధారంగా నిర్ణ‌య‌మ‌వుతుంద‌ని స్టేట్ బ్యాంక్ పేర్కొంది.