భారత ప్రభుత్వం ప్ర‌వేశ‌పెట్టిన‌ ఆధార్ కార్డు వల్ల అక్ర‌మాల‌కు అడ్డుకట్ట పడిందని యూఐడీఏఐ మాజీ ఛైర్మెన్ నంద‌న్ నీలేక‌ని పేర్కొన్నారు. ఆధార్ న‌మోదుతో నిజమైన లబ్దిదారులకు ప్రభుత్వ పథకాలు చేరుతున్నాయని అన్నారు. ప్ర‌తి ఒక్క‌రికి ఒకే శాశ్వ‌త ఆధార్ సంఖ్య క‌లిగి ఉండ‌టం వ‌లన ఎలాంటి అక్ర‌మాలు జ‌రిగే అవ‌కాశం ఉండ‌ద‌ని స్ప‌ష్టం చేశారు. త‌ద్వారా ప్ర‌భుత్వ ఖ‌జానాకు 58,450 కోట్ల (9 బిలియ‌న్ డాల‌ర్లు) మిగులు చేకూరిన‌ట్లు తెలిపారు.

అమెరికా పర్యటనలో ఉన్న నీలేకని ప్రపంచ బ్యాంకు, ఐఎమ్ఎఫ్ వార్షిక స‌మావేశంలో పాల్గొన్నారు. ఈ సందర్భంగా ప్ర‌సంగిస్తూ డిజిట‌ల్ వ్య‌వ‌స్థ‌ను స‌రిగ్గా వినియోగించుకుంటే అబివృద్ధి చెందుతున్న దేశాలు చాలా స‌మ‌స్య‌ల‌ను అధిగ‌మించ‌వ‌చ్చ‌ని ఆయ‌న అన్నారు. డేటా ఎకానమీ, గుర్తింపు ధ్రువీకరణ, చెల్లింపులు సున్నితంగా సాగడం, కాగిత రహిత లావాదేవీలు మొదలైనవీ డిజిటల్‌ ఎకానమీలో ప్రధాన పాత్ర పోషిస్తాయ‌ని తెలిపారు. డిజిట‌ల్ ఆర్థిక వ్య‌వ‌స్థ‌ల్లో మొద‌ట ఖ‌ర్చు త‌గ్గించ‌డ‌మే ముఖ్య‌మ‌ని, ఒక‌సారి అది జ‌రిగితే ఆర్థికంగా అంద‌రినీ పైకి తీసుకురావ‌డం సాధ్య‌మ‌వుతుంద‌ని నీలేక‌ని అభిప్రాయ‌ప‌డ్డారు.
దేశవ్యాప్తంగా ఇప్పటివరకూ 100 కోట్ల‌కు పైగా ప్రజలు ఆధార్‌ను నమోదు చేసుకున్నారని చెప్పారు. ఆధార్ సంఖ్య‌ జారీ కార్యక్రమాన్ని గత యూపీఏ ప్రభుత్వం అమలులోకి తీసుకొచ్చినా, ప్రస్తుత ప్రధాని నరేంద్రమోదీ నేతృత్వంలోని ప్రభుత్వం విజ‌య‌వంతంగా ముందుకు తీసుకెళ్తొందని కితాబిచ్చారు.