రైల్వే ప్ర‌యాణికుల‌కు శుభ‌వార్త అందించింది. రైల్వే ఈ-టికెట్లపై సేవా రుసుము మినహాయింపును 2018 మార్చి చివరి వరకు పొడిగించింది. గత ఏడాది నవంబర్‌లో పెద్దనోట్ల రద్దు తర్వాత నగదు ఆన్‌లైన్‌ లావాదేవీలను ప్రోత్స‌హించేందుకు ఈ-టికెట్లపై సేవా రుసుముకు కేంద్రం తాత్కాలికంగా మినహాయింపునిచ్చింది. తాజాగా ఈ మినహాయింపును 2018 మార్చి 31వరకు పెంచుతూ రైల్వే బోర్డు నిర్ణయం తీసుకుంది. ఐఆర్‌సీటీసీ ద్వారా ఆన్‌లైన్‌లో బుక్‌ చేసే రైలు టికెట్లపై రూ.20 నుంచి రూ.40 వరకు గతంలో సేవా రుసుం వసూలు చేశారు.

రైలు ప్ర‌యాణాల‌కు సంబంధించి టిక్కెట్ల‌ను బుకింగ్ వ్య‌వ‌హారాల‌ను చూసే అధీకృత సంస్థ ఐఆర్‌సీటీసీ. ప్ర‌యాణికులు ఈ-టిక్కెట్లు బుక్ చేసుకునేలా ప్రోత్స‌హించే చ‌ర్య‌ను బోర్డు స‌మ‌ర్థించింది. మాములుగా ఐఆర్‌సీటీసీకి వచ్చే ఆదాయం 33 శాతం సేవా రుసుముల నుంచే వస్తోంద‌ని సీనియ‌ర్ రైల్వే అధికారులు అన్నారు. గతేడాది ఐఆర్‌సీటీసీకి వచ్చిన మొత్తం ఆదాయంలో కేవలం సేవా రుసుము ద్వారానే రూ.540 కోట్లు రావడం గమనార్హం. ఈ ఛార్జీల రద్దు కార‌ణంగా న‌వంబ‌ర్ 23,2016 నుంచి 28,ఫిబ్ర‌వ‌రి 2017 మ‌ధ్య బుక్ అయిన టిక్కెట్ల‌పై సేవా ప‌న్ను క‌ట్టించక‌పోవ‌డం వ‌ల్ల ఐఆర్‌సీటీసీకి రూ.184 కోట్ల మేర ఆదాయం తగ్గింది.