ఆటోమొబైల్ విభాగంలో వేగంగా మారుతున్న అవ‌స‌రాల‌కు త‌గ్గ‌ట్లుగా ఉత్ప‌త్తుల త‌యారీ,ఇత‌ర అంశాల‌కు సంబంధించి ప‌రస్ప‌రం స‌హ‌క‌రించుకునేందుకు ఫోర్డ్ మోటార్‌, ఎం అండ్ ఎం జ‌ట్ట‌కట్టాయి. ఉత్ప‌త్తుల త‌యారీ, ఎలక్ట్రిక్ వాహ‌నాలు, దేశవిదేశాల్లో వాహ‌నాల,ఉత్ప‌త్తుల‌ పంపీణీ వంటి పలు అంశాలకు సంబంధించి ఇరు సంస్థలు వ్యూహాత్మక భాగస్వామ్యం కుదుర్చుకున్నాయి. ఫోర్డ్‌ మోటార్‌, ఎం అండ్‌ ఎం కంపెనీలు తాజా ఎంవోయూలో భాగంగా మొబిలిటీ ప్రోగ్రామ్స్‌, కన్సెప్ట్‌ వెహికల్‌ ప్రాజెక్ట్స్‌, ఎలక్ట్రిఫికేషన్‌, ప్రొడక్ట్‌ డెవలప్‌మెంట్‌ వంటి అంశాల్లో పరస్పర సహకారం అందించుకోనున్నాయి.

ఈ వ్యూహాత్మక భాగస్వామ్యం మూడేళ్లపాటు కొనసాగుతుందని ఇరు కంపెనీలు తెలిపాయి. 'ఇదివరకు ఫోర్డ్‌ మోటార్‌తో కుదర్చుకున్న భాగస్వామ్యం పునాదులపైనే తాజా ఒప్పందం కుదిరింది. దీని వల్ల ఇరు కంపెనీలకు ప్రయోజనం ఉంటుంది' అని మహీంద్రా అండ్‌ మహీంద్రా మేనేజింగ్‌ డైరెక్టర్‌ పవన్‌ గోయెంకా తెలిపారు. కొత్త టెక్నాలజీలు అందుబాటులోకి రావడం, స్థిరమైన పాలసీల రూపకల్పన వంటి పలు అంశాల వల్ల ఆటోమోటివ్‌ పరిశ్రమలో మార్పులు చోటుచేసుకున్నాయని పేర్కొన్నారు. మారుతున్న మార్కెట్‌ ట్రెండ్‌కు అనుగుణంగా అవకాశాలను అందిపుచ్చుకునేందుకు ఈ భాగస్వామ్యం కుర్చుకున్నామని తెలిపారు. 'భారత్‌ తమకు ప్రధాన మార్కట్‌. వినియోగదారులకు ఉత్తమమైన వాహనాలను, సర్వీసులను అందించేందుకు ఈ ఒప్పందం దోహదపడుతుంది' అని ఫోర్డ్‌ ఎగ్జిక్యూటివ్‌ వైస్‌-ప్రెసిడెంట్‌ జిమ్‌ ఫార్లీ తెలిపారు. కాగా 1990 మధ్యకాలంలో ఇరు సంస్థలు సమాన వాటాలతో మహీంద్రా ఫోర్డ్‌ ఇండియా అనే జాయింట్‌ వెంచర్‌ను ఏర్పాటు చేశాయి. తర్వాత ఫోర్డ్‌ కంపెనీ ఈ వెంచర్‌లో తన వాటాను పెంచుకుంది. దీంతో మహీంద్రా దాని నుంచి బయటకు వచ్చేసింది.