త‌క్కువ ద‌ర‌లో ఫీచ‌ర్ ఫోన్

తక్కువ ధరలో ఉచిత వాయిస్‌ కాలింగ్‌ సదుపాయంతో ఈ ఫీచ‌ర్ ఫోన్ రానుంది. బీఎస్‌ఎన్‌ఎల్‌ ఛైర్మన్‌ అనుపమ్‌ శ్రీవాస్తవ దీనికి సంబంధించిన విష‌యాల‌ను వెల్లడించారు. ఇందుకోసం బీఎస్‌ఎన్‌ఎల్‌.. లావా, మైక్రోమాక్స్‌ సంస్థలతో భాగస్వామ్య ఒప్పందాన్ని కుదుర్చుకుంది. ఉచిత వాయిస్‌ కాలింగ్‌ సదుపాయంతో రూ.2000కే బీఎస్‌ఎన్‌ఎల్‌ ఈ ఫీచర్‌ ఫోన్‌ను తీసుకురానుంది.

అక్టోబ‌ర్ నాటికి మార్కెట్లోకి

రెండు సంస్థల భాగస్వామ్యంతో అక్టోబర్‌ నాటికి ఈ ఫోన్‌ను మార్కెట్లోకి విడుదల చేసేందుకు సన్నాహాలు చేస్తున్నట్లు శ్రీవాస్తవ తెలిపారు. బీఎస్‌ఎన్‌ఎల్‌కు దాదాపు 10.5కోట్ల మంది చందాదారులు ఉన్నారు. అయితే రెండు సంస్థల సహకారంతో తీసుకొచ్చే ఈ ఫీచర్‌ ఫోన్‌ తయారీకి ఎంత ఖర్చు అవుతుందనే విషయాన్ని మాత్రం వెల్లడించలేదు.

సెమీ అర్బ‌న్ మీదే దృష్టి

దీపావళి పండుగలోపు ఈ ఫోన్‌ను వినియోగదారులకు అందుబాటులోకి తీసుకొచ్చేందుకు ముమ్మరంగా కసరత్తులు జరుగుతున్నాయి. సైబర్‌ మీడియా రీసెర్చ్‌(సీఎంఆర్‌) నివేదిక ప్రకారం దాదాపు 15శాతం ఆదాయం ఫీచర్‌ ఫోన్ల ద్వారా వస్తుండగా.. మార్కెట్లో ఇవి 57శాతం ఉన్నాయి. సెమీ అర్బన్‌, గ్రామీణ ప్రాంతాల్లోని వినియోగదారులు ఎక్కువగా ఫీచర్‌ ఫోన్లను ఉపయోగిస్తున్నారు. అయితే ఈ బీఎస్ఎన్ఎల్ ఫోన్‌కు ఎక్కువ‌గా సెబీ అర్బ‌న్‌లోనే స్పంద‌న ఉంటుంద‌ని భావిస్తున్నారు.

స్మార్ట్‌ఫోన్ల మీద అంత ఆస‌క్తి లేకే .. ఇలా..

మొబైల్‌ మార్కెటింగ్‌ అసోసియేషన్‌(ఎంఎంఏ), కంతర్‌ ఐఎంఆర్‌బీ సంయుక్తంగా ఇటీవల నిర్వహించిన సర్వే ప్రకారం 85శాతం ఫీచర్‌ ఫోన్‌ వినియోగదారులు స్మార్ట్‌ఫోన్లు కొనుగోలు చేయడానికి ఆసక్తి చూపడం లేదు. త‌క్కువ ధ‌ర‌లో మంచి ఫీచ‌ర్లు ఉన్న స్మార్ట్ ఫోన్ అయినా స‌రే అన‌వ‌సరంగా కొంత మంది కొనేందుకు మొగ్గుచూప‌డం లేదు. దీన్ని దృష్టిలో పెట్టుకునే ఉచిత కాల్స్ అందించే ప్లాన్లు ప్ర‌వేశ‌పెట్టి రెవెన్యూల‌ను పెంచుకునే దిశగా టెలికాం కంపెనీలు యోచిస్తున్నాయి.