ప్రముఖ ఆటోమొబైల్ సంస్థ హోండా కార్స్ ఇండియా లిమిటెడ్ (హెచ్‌సిఐఎల్) తమ సిటీ, బిఆర్-5, సిఆర్-5 మోడళ్ల వాహన ధరలను దాదాపు 7 వేల రూపాయల నుంచి 90 వేల రూపాయల మేరకు పెంచింది. వస్తు, సేవల పన్ను (జిఎస్‌టి)లో ప్రభుత్వం అదనంగా 2 నుంచి 7 శాతం మేరకు నష్టపరిహార సెస్సు విధించడంతో తమ వాహన ధరలను పెంచాల్సి వచ్చిందని, పెరిగిన ధరలు ఈ నెల 11వ తేదీ నుంచే అమల్లోకి వచ్చాయని ఆ సంస్థ గురువారం ఒక ప్రకటనలో వెల్లడించింది. కారు ర‌కాల‌ను బట్టి మిడ్ సైజ్డ్ సెడాన్ 'సిటీ' మోడల్ కారు ధరను రూ.7,003 నుంచి రూ.18,791 మేరకు పెంచిన హెచ్‌సిఐఎల్, బిఆర్-5 ఎస్‌యువి ధరను రూ.12,490 నుంచి రూ.18,242 మేరకు, అలాగే సిఆర్-5 ఎస్‌యువి ధరను రూ.75,304 నుంచి రూ.89,069 మేర పెంచింది.