దేశ స్టాక్ మార్కెట్ ట్రేడింగ్ స‌మ‌యాన్ని పొడిగించ‌డం లేద‌ని బీఎస్ఈ అధిప‌తి వివ‌ర‌ణ ఇచ్చారు. ప్ర‌స్తుతం ఉన్న విధంగానే 6.15 గంట‌లు(9.15-3.30) ట్రేడింగ్ స‌మ‌యం మాత్ర‌మే కొన‌సాగుతుంద‌ని బీఎస్ఈ ఎండీ,సీఈవో ఆశీష్ కుమార్ చౌహాన్ చెప్పారు. ఈ విష‌యంపై స్టాక్ ఎక్స్చేంజీ కానీ లేదా స‌బ్ క‌మిటీ కానీ ఎటువంటి ప్ర‌తిపాద‌న‌ను సూచించ‌లేద‌ని చౌహాన్ సూచ‌న‌ప్రాయంగా చెప్పారు. దీన్ని మీడియా సృష్టించిన వార్త‌గా కొట్టిపారేశారు.

ఈ స‌మ‌స్య‌కు సంబంధించి చాలా అంశాలు ముడిప‌డ్డాయ‌ని చౌహాన్ అన్నారు. చాలా మంది వేళ‌లు పెంచాల‌ని, క‌మొడిటీ మార్కెట్లు ఎలా ప‌నిచేస్తాయో క‌నీసం వారితో స‌మానంగా త‌మ‌ను ప‌రిగ‌ణించాల‌ని కోరుతున్నార‌ని తెలిపారు. ఎందుకంటే క‌మొడిటీ మార్కెట్లు అర్ధ‌రాత్రి వ‌ర‌కూ ప‌నిచేస్తాయి. అయితే ట్రేడింగ్ స‌మ‌యాన్ని పెంచ‌డంలో ఎటువంటి సాంకేతిక స‌మ‌స్య‌లు లేవ‌న్నారు. ఎందుకంటే ఇండియా ఐఎన్ఎక్స్ పేరుతో గిఫ్ట్ సిటీలో న‌డుపుతున్న ఎక్స్చేంజీలో ఎక్కువ స‌మ‌యం ఇచ్చిన సంగ‌తిని గుర్తుచేశారు. అయితే మ‌రో వైపు ట్రేడింగ్ స‌మ‌యాన్ని పెంచ‌డం గురించి ఇది చూడాలి. నియంత్ర‌ణ సంస్థ‌లు ఎక్కువ స‌మ‌యం ప‌నిచేయాలి. ఎక్స్చేంజీ ఉద్యోగులు కూడా అధిక స‌మ‌యాలు కార్యాల‌యాల్లో ఉండి ప‌నిచేయాల్సి వ‌స్తుంది. అంతే కాకుండా ఇత‌ర మౌలిక స‌దుపాయాలు(క్లియ‌రెన్స్‌, సెటిల్‌మెంట్‌) అద‌నంగా క‌ల్పించాల్సి ఉంటుంది.